ന്യൂഡൽഹി : ഇന്ത്യൻ ശിക്ഷാ നിയമത്തിലും (ഐപിസി), ക്രിമിനൽ പ്രൊസീജർ കോഡിലും (സിആർപിസിയും ) ഭേദഗതി വരുത്താൻ കേന്ദ്രം പദ്ധതിയിടുന്നുണ്ടെന്ന് കേന്ദ്ര ആഭ്യന്തര സഹമന്ത്രി ജി കിഷൻ റെഡ്ഡി. ഇക്കാര്യത്തിൽ നിർദേശങ്ങൾ സ്വീകരിച്ചു വരികയാണെന്നും അദ്ദേഹം വ്യക്തമാക്കി. കിഷൻ റെഡ്‌ഡിയുടെ നിയോജക മണ്ഡലമായ സെക്കന്ദരാബാദിലെ അംബർപെറ്റിൽ സ്ഥാപിച്ചിട്ടുള്ള സിസിടീവികളുടെ ഉദ്ഘാടനം നിർവഹിക്കവെയാണ്‌ അദ്ദേഹം ഐപിസിയിലും സിആർപിസിയിലും കേന്ദ്രസർക്കാർ ഭേദഗതി വരുത്താൻ പദ്ധതിയിടുന്നുണ്ടെന്ന കാര്യം സൂചിപ്പിച്ചത്.
ഇന്ത്യയിൽ ക്രിമിനൽ കുറ്റങ്ങൾ ചെയ്യുന്നവർക്ക് നൽകപ്പെടുന്ന ശിക്ഷകളെപ്പറ്റി പ്രതിപാദിക്കുന്ന നിയമസംഹിതയാണ്‌ ഇന്ത്യൻ പീനൽ കോഡ്. ക്രിമിനൽ കേസുകൾ വിചാരണ ചെയ്യുന്ന കോടതികളിലെ നടപടി ക്രമമാണ് ക്രിമിനൽ പ്രൊസീജർ കോഡിലുണ്ടായിരിക്കുക. രാജ്യത്തിന്റെ താല്പര്യങ്ങൾക്ക് കൂടുതൽ പ്രാധാന്യം നൽകി പ്രവർത്തിക്കുന്ന രീതിയിലേക്ക് മാറ്റിയെടുക്കാൻ ഉദ്ദേശിക്കുന്ന ഗുജറാത്തിലെ രാഷ്ട്രീയരക്ഷാ യൂണിവേഴ്സിറ്റി, രാജ്യത്തെ പോലീസ് സംവിധാനത്തിന്റെ പ്രവർത്തനങ്ങളിൽ വലിയ മാറ്റങ്ങൾ വരുത്തുമെന്ന് അദ്ദേഹം ചൂണ്ടിക്കാട്ടി.
നാഷണൽ ഫോറൻസിക് സയൻസസ് യൂണിവേഴ്സിറ്റിയിലൂടെ ക്രിമിനോളജി, ഫോറൻസിക് സയൻസ് തുടങ്ങിയ വിഷയങ്ങൾ കൂടുതൽ വിദ്യാർഥികളിലേക്ക് എത്തിക്കാൻ സാധിക്കുമെന്നും അദ്ദേഹം കൂട്ടിച്ചേർത്തു.
