രാമാനന്ദ സാഗറിന്റെ ‘ശ്രീരാമൻ‘ ബിജെപിയിൽ ചേർന്നു; പാർട്ടി അംഗമാകുന്നത് ലോകത്തിലെ ഏറ്റവും ജനപ്രിയ പരമ്പരയിലെ നായക നടൻ

ഡൽഹി: നടൻ അരുൺ ഗോവിൽ ബിജെപിയിൽ ചേർന്നു. രാമാനന്ദ സാഗറിന്റെ ലോകപ്രശസ്തമായ ‘രാമായണം‘ പരമ്പരയിൽ ശ്രീരാമന്റെ വേഷം അവതരിപ്പിച്ച നടനാണ് അരുൺ ഗോവിൽ.

ഡൽഹിയിലെ ബിജെപി ആസ്ഥാനത്തെത്തിയാണ് അരുൺ ഗോവിൽ പാർട്ടി അംഗത്വം സ്വീകരിച്ചത്. നാല് സംസ്ഥാനങ്ങളിലും പുതുച്ചേരിയിലും ഉൾപ്പെടെ നിയമസഭാ തെരഞ്ഞെടുപ്പ് നടക്കാനിരിക്കെയാണ് താരം ബിജെപിയിൽ ചേർന്നത്.

1977ൽ പുറത്തിറങ്ങിയ ‘പഹേലി‘ എന്ന സൂപ്പർഹിറ്റ് ചിത്രത്തിലൂടെയായിരുന്നു അരുൺ ഗോവിലിന്റെ അരങ്ങേറ്റം. പിന്നീട് രാമായണം എന്ന ഇതിഹാസ പരമ്പരയിൽ ഭഗവാൻ ശ്രീരാമന്റെ റോളിലേക്ക് രാമാനന്ദ സാഗർ അദ്ദേഹത്തെ തിരഞ്ഞെടുക്കുകയായിരുന്നു. തുടർന്ന് ഇന്ത്യൻ മിനിസ്ക്രീൻ പ്രേക്ഷകരുടെ സ്വന്തം ശ്രീരാമനായി മാറിയ അരുൺ ഗോവിൽ രാജ്യത്തെ ഏറ്റവും പ്രശസ്തനായ നടനായി ഉയരുകയായിരുന്നു.

കൊവിഡ് ലോക്ക് ഡൗണിന്റെ പശ്ചാത്തലത്തിൽ 33 വർഷങ്ങൾക്ക് ശേഷം 2020 ഏപ്രിലിൽ രാമായണം ദൂരദർശൻ പുനസംപ്രേക്ഷണം ചെയ്തിരുന്നു. അന്ന് ലോകത്താകമാനം 167.7 കോടി ജനങ്ങൾ കണ്ട രാമായണം പരമ്പര ലോകത്ത് ഏറ്റവുമധികം ആളുകൾ കണ്ട ടിവി പരിപാടി എന്ന റെക്കോർഡ് സ്വന്തമാക്കിയിരുന്നു.