ന്യൂഡൽഹി / ധാക്ക: രണ്ട് ദിവസത്തെ സന്ദർശനത്തിനായി പ്രധാനമന്ത്രി നരേന്ദ്ര മോദി ബംഗ്ലാദേശിലെത്തി. ധാക്കയിലെത്തിയ പ്രധാനമന്ത്രി നരേന്ദ്ര മോദിയെ ബംഗ്ലാദേശ് പ്രധാനമന്ത്രി ഷെയ്ഖ് ഹസീന സ്വാഗതം ചെയ്തു. ഗാർഡ് ഓഫ് ഓണർ നൽകിയാണ് നരേന്ദ്ര മോദിയെ രാജ്യം സ്വാഗതം ചെയ്തത്.
ബംഗ്ലാദേശ് പ്രധാനമന്ത്രി ഷെയ്ഖ് ഹസീനയുടെ ക്ഷണപ്രകാരമാണ് രണ്ട് ദിവസത്തെ സന്ദർശനത്തിനായി മോദി ബംഗ്ലാദേശിലെത്തിയത്.ബംഗ്ലാദേശിന്റെ അൻപതാം സ്വാതന്ത്ര്യ വാർഷികമായ ഇന്ന് നടക്കുന്ന പരിപാടികളിൽ നരേന്ദ്ര മോദി മുഖ്യാതിഥിയാകും. തുടർന്ന് നടക്കുന്ന ആഘോഷ പരിപാടികളിലും അദ്ദേഹം പങ്കെടുക്കും. സന്ദർശന വേളയിൽ പ്രധാനമന്ത്രി മോദി ധാക്കയിൽ നടക്കുന്ന ബാപ്പു ബംഗബന്ധു ഡിജിറ്റൽ വീഡിയോ എക്സിബിഷൻ ഉദ്ഘാടനം ചെയ്യും. ബംഗ്ലാദേശ് വിദേശകാര്യമന്ത്രിയുമായി മോദി കൂടിക്കാഴ്ച നടത്തും.
കൊറോണ പകർച്ചവ്യാധി ആരംഭിച്ചതിനുശേഷം പ്രധാനമന്ത്രിയുടെ ആദ്യ വിദേശ യാത്രയാണിത്. 497 ദിവസത്തിന് ശേഷമാണ് നരേന്ദ്ര മോദി വിദേശയാത്ര നടത്തുന്നത്.
പ്രധാനമന്ത്രി മോദി ബംഗ്ലാദേശിലെ മാത്വ സമുദായംഗങ്ങളുമായും ഇന്ന് കൂടിക്കാഴ്ച നടത്തും. മാത്വ സമുദായം ബംഗാളിലെ ഏറ്റവും കൂടുതൽ ജനസംഖ്യയുള്ള വിഭാഗങ്ങളിലൊന്നാണ് .
