പത്തനംതിട്ട: കൊവിഡ് വ്യാപനം രൂക്ഷമായിരിക്കുന്ന സാഹചര്യത്തിൽ സംസ്ഥനത്ത് നിയന്ത്രണങ്ങൾ ശക്തമാക്കിയിരിക്കുകയാണ്. ഈ പശ്ചാത്തലത്തിൽ പൊരിവെയിലിലും വിശപ്പും ദാഹവും സഹിച്ച് കൊവിഡ് ഡ്യൂട്ടി ചെയ്യുന്ന പൊലീസുകാരോട് ഉദ്യോഗസ്ഥ തലത്തിൽ കടുത്ത അവഗണന തുടരുന്നതായി പരാതി.
സർക്കാർ ഉദ്യോഗസ്ഥർക്ക് ശമ്പള പരിഷ്കരണം പ്രഖ്യാപിച്ചപ്പോൾ ആനുപാതികമായി പൊലീസുകാർക്കും ശമ്പള വർദ്ധനവ് പ്രഖ്യാപിച്ചിരുന്നു. ഇതിന്റെ ആനുകൂല്യം മാർച്ച് മുതൽ ഇവർക്ക് ലഭിക്കേണ്ടതാണ്. എന്നാൽ ഇതുവരെയും തങ്ങൾക്ക് വർദ്ധിപ്പിച്ച അടിസ്ഥാന ശമ്പളം ലഭ്യമായിട്ടില്ലെന്ന് പത്തനംതിട്ടയിലെ ഒരു വിഭാഗം പൊലീസുകാർ പറയുന്നു. ശമ്പളം എഴുതേണ്ട മിനിസ്റ്റീരിയൽ സ്റ്റാഫിന്റെ കെടുകാര്യസ്ഥതയാണ് ഇതിനു പിന്നിലെന്നും ഇവർ ആരോപിക്കുന്നു.
സംസ്ഥാനത്തെ മറ്റ് മേഖലകളിൽ പ്രശ്നമില്ലെന്നും പത്തനംതിട്ടയിലെ ചില പൊലീസുകാർക്ക് മാത്രമാണ് ബുദ്ധിമുട്ട് നേരിടുന്നതെന്നുമാണ് ഉദ്യോഗസ്ഥ തലത്തിലെ അനൗദ്യോഗിക വിശദീകരണം. നിയന്ത്രണങ്ങൾ പ്രഖ്യാപിക്കപ്പെട്ടിരിക്കുന്ന സാഹചര്യത്തിൽ വീടുകളിൽ പോലും പോകാനാകാതെ ജോലി ചെയ്യുന്ന തങ്ങളുടെ കാര്യത്തിൽ എത്രയും വേഗം അനുകൂല നിലപാടുണ്ടാകും എന്നാണ് പൊലീസുകാരുടെ പ്രതീക്ഷ.
Discussion about this post