മുംബൈ: ചലച്ചിത്ര നിര്‍മാതാവും മാധ്യമപ്രവര്‍ത്തകനുമായിരുന്ന പ്രദീപ് ഗുഹ (69) അന്തരിച്ചു. മുംബൈയിലെ കോകിലബെന്‍ ധീരുഭായ് അംബാനി ആശപത്രിയില വെച്ചായിരുന്നു അര്‍ബുദ ബാധിതനായിരുന്ന ഗുഹയുടെ അന്ത്യം. ഋത്വിക് റോഷന്‍, കരിഷ്മ കപൂര്‍ എന്നിവര്‍ അഭിനയിച്ച ‘ഫിസ’ 2008ല്‍ പുറത്തിറങ്ങിയ ‘ഫിര്‍ കഭി’ എന്നീ ചിത്രങ്ങളാണ് നിര്‍മിച്ചത്.
നാല് പതിറ്റാണ്ടുകാലം മാധ്യമ, പരസ്യം, മാര്‍ക്കറ്റിങ്, ബ്രാന്‍ഡിങ് മേഖലകളില്‍ പ്രവര്‍ത്തിച്ചു. 30 വര്‍ഷക്കാലം ടൈംസ് ഗ്രൂപ്പിനൊപ്പമുണ്ടായിരുന്ന അദ്ദേഹം കമ്പനിയുടെ പ്രസിഡന്‍റായി സേവനം അനുഷ്ടിച്ചു. കമ്പനിയുടെ ബോര്‍ഡ് ഓഫ് ഡയരക്ടേഴ്സിലും അംഗമായിരുന്നു.
മൂന്ന് വര്‍ഷം സീ എന്‍റര്‍ടെയ്ന്‍മെന്‍റ് സി.ഇ.ഒ ആയിരുന്നു. ഇന്‍റര്‍നാഷനല്‍ അഡ്വര്‍ടൈസിങ് അസോസിയേഷന്‍, ഏഷ്യ പസിഫിക് മേഖലയുടെ വൈസ് പ്രസിഡന്‍റ് ഏരിയ ഡയരക്ടര്‍ ചുമതലകള്‍ വഹിച്ചു. നിലവില്‍ 9X മീഡിയ പ്രൈവറ്റ് ലിമിറ്റഡിന്‍റെ മാനേജിങ് ഡയരക്ടറാണ്.
പ്രദീപ് ഗുഹയുടെ നിര്യാണത്തിൽ മനോജ് ബാജ്പേയി, പ്രിയങ്ക ചോപ്ര, സുഭാഷ് ഗായ്, ലാറ ദത്ത, അദ്നാന്‍ സാമി എന്നിങ്ങനെ സിനിമ മേഖലയില്‍ നിന്നുള്ള പ്രമുഖര്‍ അനുശോചിച്ചു.
Discussion about this post