2021-ലെ പശ്ചിമ ബംഗാൾ നിയമസഭാ തിരഞ്ഞെടുപ്പ് പ്രചാരണത്തിനിടെ മുൻ മുഖ്യമന്ത്രി മമത ബാനർജിക്ക് കാലിന് പരിക്കേറ്റെന്ന അവകാശവാദം വ്യാജമാണെന്ന് ആരോപിച്ചുകൊണ്ട് നിലവിലെ മുഖ്യമന്ത്രി സുവേന്ദു അധികാരി രംഗത്തെത്തി. നന്ദിഗ്രാമിലെ പ്രചാരണത്തിനിടെ മമത ബാനർജിക്ക് സംഭവിച്ച അപകടം അഭിനയമായിരുന്നുവെന്നും ഇത് സംബന്ധിച്ച് സർക്കാർ തലത്തിൽ സമഗ്രമായ അന്വേഷണം നടത്തുമെന്നും അദ്ദേഹം പ്രഖ്യാപിച്ചു. ഈ വ്യാജ അവകാശവാദത്തെക്കുറിച്ച് അന്വേഷിച്ച് യഥാർത്ഥ വിവരങ്ങൾ പുറത്തുകൊണ്ടുവരാൻ സംസ്ഥാന സർക്കാർ ഉത്തരവിട്ടിട്ടുണ്ട്.
അന്ന് ബാങ്കൂർ ഇൻസ്റ്റിറ്റ്യൂട്ട് ഓഫ് ന്യൂറോസയൻസസ് നൽകിയ മെഡിക്കൽ റിപ്പോർട്ടിന്റെ പകർപ്പ് തന്റെ കൈവശമുണ്ടെന്ന് സുവേന്ദു അധികാരി വെളിപ്പെടുത്തി. പരിശോധനാ റിപ്പോർട്ടിൽ അസ്ഥിഭംഗമോ മറ്റ് ഗുരുതര പരിക്കുകളോ ഇല്ലെന്ന് ഡോക്ടർമാർ വ്യക്തമായി രേഖപ്പെടുത്തിയിട്ടുണ്ടെന്ന് അദ്ദേഹം പറഞ്ഞു. വാഹനത്തിന്റെ തുറന്ന വാതിൽ ഇരുമ്പ് പോസ്റ്റിൽ തട്ടി ചെറിയ പരിക്ക മാത്രമാണ് ഉണ്ടായതെന്നും, എന്നാൽ ഇത് രാഷ്ട്രീയ ലാഭത്തിനായി മമത ബാൻഡേജ് ഇട്ട് പ്രചാരണത്തിന് ഉപയോഗിക്കുകയായിരുന്നുവെന്നും അദ്ദേഹം ആരോപിച്ചു.
നിലവിൽ ഉപതിരഞ്ഞെടുപ്പ് പെരുമാറ്റച്ചട്ടം നിലവിലുള്ളതിനാൽ ഒക്ടോബർ ഒൻപതിന് ശേഷം ഇതുമായി ബന്ധപ്പെട്ട കൂടുതൽ തെളിവുകളും രേഖകളും പൊതുസമക്ഷം പുറത്തുവിടുമെന്നും അദ്ദേഹം വ്യക്തമാക്കി. അന്ന് പ്രാദേശിക നേതാക്കളെ കേസിൽ കുടുക്കുകയും പ്രദേശത്തെ ജനങ്ങളെ അപമാനിക്കുകയും ചെയ്തതിനെതിരെ ശക്തമായ അന്വേഷണം ഉണ്ടാകുമെന്ന് അദ്ദേഹം കൂട്ടിച്ചേർത്തു. അടുത്ത ദിവസങ്ങളിൽ ഈ വിഷയം പശ്ചിമ ബംഗാൾ രാഷ്ട്രീയത്തിൽ വലിയ വിവാദങ്ങൾക്കും ചർച്ചകൾക്കും വഴിതുറക്കുമെന്നാണ് കരുതപ്പെടുന്നത്.
