ഏഡന്‍ : യെമനിലെ ഏഡനില്‍ വിമതവിഭാഗമായ ഹൂതികള്‍ നടത്തിയ മിസൈല്‍ ആക്രമണത്തില്‍ സൗദി നയിക്കുന്ന അറബ് സഖ്യസേനയിലെ മലയാളി ഉള്‍പ്പെടെ 22 പേര്‍ കൊല്ലപ്പെട്ടു. യു.എ.ഇ സൈനിക ക്യാംപ് ജീവനക്കാരനായി ഇവിടെയുണ്ടായിരുന്ന മലപ്പുറം ഒഴൂര്‍ എരനെല്ലൂര്‍ കെ. ഹനീഫയും (51) കൊല്ലപ്പെട്ടതായാണ് വിവരം. ഒട്ടേറെപ്പേര്‍ക്കു പരുക്കേറ്റിട്ടുണ്ട്. കൊല്ലപ്പെട്ടവരില്‍ നാലുപേര്‍ യു.എ.ഇ സൈനികരാണ്. സര്‍ക്കാരിന്റെ താല്‍ക്കാലിക ആസ്ഥാനമായ ഖസ്ര്‍ ഹോട്ടലിനു നേരെയായിരുന്നു ആക്രമണം.
യെമന്‍ വൈസ് പ്രസിഡന്റും പ്രധാനമന്ത്രിയുമായ ഖാലിദ് ബഹാഹും ഒട്ടേറെ മന്ത്രിമാരും ഹോട്ടലില്‍ ഉണ്ടായിരുന്നെങ്കിലും സുരക്ഷിതരാണ്. ജൂലൈയില്‍ വിമതപക്ഷത്തില്‍നിന്ന് ഏഡന്‍ പിടിച്ചെടുത്ത ശേഷമുണ്ടായ ഏറ്റവും കനത്ത ആക്രമണമാണുണ്ടായത്. സഖ്യസേനയിലെ യു.എ.ഇ സൈനികര്‍ക്കായിരുന്നു ഇവിടെ സുരക്ഷാച്ചുമതല. യെമന്‍ തലസ്ഥാനമായ സനായില്‍ പള്ളിക്കു നേരെയുണ്ടായ ചാവേര്‍ ബോംബാക്രമണത്തില്‍ ഏഴു പേര്‍ കൊല്ലപ്പെട്ടതായും വിവരമുണ്ട്. ആക്രമണത്തിന്റെ ഉത്തവാദിത്വം ഐ.എസ് ഭീകരര്‍ ഏറ്റെടുത്തതായാണ് വിവരം.
Discussion about this post