ഹൈദരാബാദ്: ടോണി ബഞ്ചാര ഹില്‍സിലെ കെബിആര്‍ പാര്‍ക്കിന് സമീപം ഞായറാഴ്ച രാത്രി 8.30 ഓടെ അജ്ഞാതരുടെ ആക്രമണത്തില്‍ ടോളിവുഡ് നടി ശാലു ചൗരസ്യയ്ക്ക് പരിക്ക്.
യുവനടിയെ ആക്രമിച്ച സംഘം മൊബൈല്‍ ഫോണ്‍ തട്ടിയെടുക്കുകയും ചെയ്തു. പണവും വിലപിടിപ്പുള്ള വസ്തുക്കളും കൈമാറാന്‍ ഒരാള്‍ ആദ്യം ആവശ്യപ്പെട്ടതായി യുവതി പോലീസില്‍ മൊഴി നല്‍കി. എതിര്‍ത്തപ്പോള്‍ മുഖത്ത് അടിക്കുകയും കല്ലുകൊണ്ട് ആക്രമിക്കാന്‍ ശ്രമിക്കുകയും ചെയ്തു. മൊബൈല്‍ ഫോണ്‍ തട്ടിയെടുത്ത് അക്രമി രക്ഷപ്പെട്ടു.
തലയിലും കണ്ണിന് സമീപത്തും പരിക്കേറ്റ യുവതിയെ സ്വകാര്യ ആശുപത്രിയില്‍ പ്രവേശിപ്പിച്ചു. നടിയുടെ പരാതിയില്‍ ബഞ്ചാര ഹില്‍സ് പോലീസ് കേസെടുത്ത് അന്വേഷണം ആരംഭിച്ചു. അക്രമിയെ തിരിച്ചറിയാന്‍ പ്രദേശത്തെ സിസിടിവി ക്യാമറകളിലെ ദൃശ്യങ്ങള്‍ പരിശോധിച്ചു വരികയാണ്‌.
