മുംബൈ: മഹാരാഷ്ട്രയിൽ തുനിഷ ശർമ്മ ആത്മഹത്യ ചെയ്ത സംഭവത്തിൽ തുനിഷയുടെ സുഹൃത്തും സഹനടനുമായ ഷീസൻ മുഹമ്മദ് ഖാനെ കസ്റ്റഡിയിലെടുത്ത് പോലീസ് .ഷീസനുമായി തുനിഷ അടുപ്പത്തിലായിരുന്നു, എന്നാൽ 15 ദിവസം മുമ്പ് ഇരുവരും വേർപിരിഞ്ഞു, ഇത് തുനിഷയെ ഏറെ സമ്മർദ്ദത്തിലാക്കിയിരുന്നതായി തുനിഷയുടെ അമ്മ ആരോപിച്ചിരുന്നു.
അലി ബാബ എന്ന ടിവി ഷോയിൽ തുനിഷയുടെ സഹനടനായിരുന്നു ഷീസൻ. മഹാരാഷ്ട്രയിലെ പാൽഘർ ജില്ലയിലെ വസായിൽ ഒരു ടിവി ഷോയുടെ സെറ്റിൽ വച്ചാണ് തുനിഷ ശർമ്മ ആത്മഹത്യ ചെയ്തത്.മേക്കപ്പ് മുറിയുടെ വാതിൽ അകത്ത് നിന്ന് പൂട്ടിയ നിലയിലായിരുന്നുവെന്ന് സഹപ്രവര്ത്തകര് പോലീസിനോട് പറഞ്ഞു. തട്ടിവിളിച്ചെങ്കിലും മറുപടി ലഭിക്കാതെ വന്നതോടെ വാതിൽ തകർത്ത് അകത്ത് കയറുകയായിരുന്നു. തുടർന്നാണ് തുനിഷയെ തൂങ്ങിയ നിലയിൽ കണ്ടെത്തിയത്.
ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.അമ്മയ്ക്കൊപ്പം മുംബൈയിലാണ് തുനിഷ താമസിച്ചിരുന്നത്. അറസ്റ്റിലായ നടന് ഷീസൻ മുഹമ്മദ് ഖാനെ മുംബൈയിലെ വസായ് കോടതി നാല് ദിവസത്തെ പോലീസ് കസ്റ്റഡിയിൽ വിട്ടു. കോടതിയിൽ വെച്ച് ഷീസനെതിരെ ഉയര്ന്ന ആരോപണങ്ങൾ അടിസ്ഥാനരഹിതമാണെന്ന് ഷീസന്റെ അഭിഭാഷകന് വാദിച്ചു.
മറ്റൊരു സഹനടിയായ പാർത്ത് സുത്ഷിയെ സംഭവത്തിൽ ചോദ്യം ചെയ്യാൻ പോലീസ് വിളിച്ചുവരുത്തി. നടൻ ശിവിൻ നാരംഗിനൊപ്പം ഒരു മ്യൂസിക് വീഡിയോ ചിത്രീകരിക്കാൻ ശനിയാഴ്ച തുനിഷ എത്തിയിരുന്നു. ഇതിനായി മേക്കപ്പ് റൂമിൽ തയ്യാറെടുക്കുന്ന പോസ്റ്റ് അവർ ഇൻസ്റ്റാഗ്രാമിൽ പങ്കുവെച്ചിരുന്നു.
