ചരിത്ര നേട്ടവുമായി ഐ എസ് ആർ ഒ: 36 വൺ വെബ് ഇന്റർനെറ്റ് ഉപഗ്രഹങ്ങൾ വിജയകരമായി വിക്ഷേപിച്ചു (വീഡിയോ)

ന്യൂഡൽഹി: 36 വൺ വെബ് ഇന്റർനെറ്റ് ഉപഗ്രഹങ്ങൾ വിജയകരമായി വിക്ഷേപിച്ച് ഐ എസ് ആർ ഒ. ഏറ്റവും ഭാരമേറിയ ലോഞ്ച് വെഹിക്കിളായ മാർക്ക് 3 ആണ് വൺ വെബ് ഇന്ത്യ-2 ദൗത്യത്തിൽ ഐ എസ് ആർ ഒ ഉപയോഗിച്ചത്. ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിലെ രണ്ടാം ലോഞ്ച് പാഡിൽ നിന്നും രാവിലെ 9.00നായിരുന്നു വിക്ഷേപണം.

72 ഉപഗ്രഹങ്ങളെ ഭ്രമണപഥത്തിൽ എത്തിക്കാനായി യുകെ ആസ്ഥാനമായ വൺ വെബ് ഗ്രൂപ്പ് കമ്പനിയുമായി ഐ എസ് ആർ ഒയുടെ വാണിജ്യ വിഭാഗമായ ന്യൂസ്പേസ് ഇന്ത്യ ലിമിറ്റഡ് 2022 ഒക്ടോബർ 23ന് കരാറിൽ എത്തിയിരുന്നു. ഇതിന്റെ ഭാഗമായിരുന്നു വിക്ഷേപണം.

നിലവിലെ ദൗത്യത്തിന്റെ ഭാഗമായി 450 കിലോ മീറ്റർ ഭ്രമണപഥത്തിൽ 5,805 കിലോ ഗ്രാം ഭാരമുള്ള 36 ഉപഗ്രഹങ്ങളാണ് ഐ എസ് ആർ ഒ വിന്യസിക്കുന്നത്. ലോഞ്ച് വെഹിക്കിളായ മാർക്ക് 3യുടെ ആറാം വിക്ഷേപണമാണ് ഇത്. ചന്ദ്രയാൻ-2 ഉൾപ്പെടെ വിജയകരമായ അഞ്ച് ദൗത്യങ്ങളാണ് ഇതിന് മുൻപ് മാർക്ക് 3 ലോഞ്ച് വെഹിക്കിൾ ഉപയോഗിച്ച് നടത്തിയിട്ടുള്ളത്.

115 ടൺ ദ്രവ പ്രൊപ്പല്ലന്റ് ഉപയോഗിക്കാവുന്ന മാർക്ക് 3ക്ക് കരുത്ത് പകരുന്നത് 2 വികാസ് എഞ്ചിനുകളാണ്. 204 ടൺ ഖര പ്രൊപ്പല്ലന്റ് ഉപയോഗിക്കാവുന്ന ഇതിന്റെ ബൂസ്റ്ററുകൾ, ലോകത്തിലെ തന്നെ ഏറ്റവും വലിയ ഖര ബൂസ്റ്ററുകളാണ്.

#ISRO launches LVM3-M3/Oneweb India-2 Mission from Satish Dhawan Space Centre (SDSC) SHAR, #Sriharikota.#LVM3M3/#Oneweb pic.twitter.com/PAOTJSSl9J

— All India Radio News (@airnewsalerts) March 26, 2023