ന്യൂഡൽഹി: മതവികാരം വ്രണപ്പെടുത്തിയെന്ന് ചൂണ്ടിക്കാട്ടി ബോളിവുഡ് നടി തപ്സി പന്നുവിനെതിരെ പരാതി. ലക്ഷ്മി ദേവിയുടെ ശിൽപമുള്ള മാലയണിഞ്ഞ് ഫാഷൻ ഷോയിൽ പങ്കെടുത്ത സംഭവത്തിലാണ് പരാതി. മാർച്ച് 12 ന് മുംബൈയിൽ നടന്ന ലാക്മെ ഫാഷൻ വീക്കിലെ റാംപ് വാക്കിൽ തപ്സി പന്നു പങ്കെടുത്തിരുന്നു. ലക്ഷ്മീ ദേവിയുടെ ചിത്രമുള്ള മാലയണിഞ്ഞായിരുന്നു റാംപ് വാക്കിൽ പങ്കെടുത്തത്.
ഹിന്ദ് രക്ഷക് സംഘടൻ എന്ന സംഘടനയാണ് പരാതിയുമായി രംഗത്തെത്തിയത്. മതവികാരം വ്രണപ്പെടുത്തി, അശ്ലീലം പ്രചരിപ്പിച്ചു എന്നാരോപിച്ചാണ് പരാതി നൽകിയത്. ഇൻഡോറിലെ ഹിന്ദ് രക്ഷക് സംഘടനയുടെ കൺവീനറായ ഏകലവ്യ സിംഗ് ഗൗറാണ് ആരോപണം ഉന്നയിച്ചത്.
തപ്സി പന്നു മതവികാരത്തെ വ്രണപ്പെടുത്തിയെന്നും മതത്തിന്റെ പ്രതിച്ഛായയ്ക്ക് കോട്ടം വരുത്തിയെന്നും ഏകലവ്യ ഗൌർ പരാതിയിൽ പറയുന്നു. അതേ സമയം നിയമ നടപടിയെക്കുറിച്ച് പ്രതികരിക്കാനോ പ്രസ്താവന ഇറക്കാനോ തപ്സി പന്നു ഇതുവരെ തയ്യാറായിട്ടില്ല.
