പാകിസ്ഥാൻ വ്യോമപാത അടച്ചതിനെത്തുടർന്ന് ബുദ്ധിമുട്ടിലായ ഇന്ത്യൻ വിമാനക്കമ്പനികൾക്കായി പകരം പാത കണ്ടെത്താൻ ചൈനയുമായി ഉന്നതതല നയതന്ത്ര ചർച്ചകൾ നടത്തി കേന്ദ്ര സർക്കാർ. ഷിൻജിയാംഗിലെ ഹോട്ടാൻ വ്യോമപാത ഉപയോഗിക്കാൻ അനുമതി തേടിയാണ് ചർച്ചകൾ പുരോഗമിക്കുന്നത്. ഡൽഹിയിൽ നിന്ന് പാശ്ചാത്യ രാജ്യങ്ങളിലേക്കുള്ള വിമാനങ്ങൾ നിലവിൽ പാകിസ്ഥാൻ വ്യോമപാത ഒഴിവാക്കി കൂടുതൽ ദൂരം സഞ്ചരിക്കേണ്ടി വരുന്നതിനാൽ വലിയ തോതിൽ ഇന്ധനനഷ്ടവും യാത്രാസമയവും വർദ്ധിച്ചിരുന്നു.
റൂട്ട്സ് ഏഷ്യ സമ്മേളനത്തിനിടെ വ്യോമയാന മന്ത്രി രാം മോഹൻ നായിഡുവാണ് ചൈനയുമായുള്ള ചർച്ചകളെക്കുറിച്ച് സ്ഥിരീകരണം നൽകിയത്. ഹോട്ടാൻ ഇടനാഴിയ്ക്കായി ശ്രമിക്കുന്നതിനോടൊപ്പം തന്നെ, പാകിസ്ഥാൻ വ്യോമപാത തടസ്സപ്പെടാത്ത തെക്കേ ഇന്ത്യയിലെ വിമാനത്താവളങ്ങൾ കേന്ദ്രീകരിച്ച് അന്താരാഷ്ട്ര സർവീസുകൾ വ്യാപിപ്പിക്കാൻ വിമാനക്കമ്പനികളോട് നിർദ്ദേശിച്ചിട്ടുണ്ടെന്നും അദ്ദേഹം വ്യക്തമാക്കി. പ്രമുഖ വിമാനക്കമ്പനികളായ എയർ ഇന്ത്യയും ഇൻഡിഗോയും ഈ പാതയുടെ സാധ്യതകളെക്കുറിച്ച് പഠനം നടത്തിവരികയാണ്.
ഉയർന്ന പർവ്വതമേഖലയിലൂടെയുള്ള ഈ യാത്രയിൽ യാത്രക്കാരുടെ സുരക്ഷ ഉറപ്പാക്കുന്നതിനായി കൂടുതൽ ഓക്സിജൻ ശേഖരമുള്ള ബോയിംഗ്, എയർബസ് വിമാനങ്ങളാണ് ഉപയോഗിക്കുക. മുൻപും സമാനമായ രീതിയിൽ അഫ്ഗാനിസ്ഥാനിൽ ഭരണം മാറിയപ്പോൾ ഹിന്ദുകുഷ് പർവ്വതനിരകൾക്ക് മുകളിലൂടെ പുതിയ പാത കണ്ടെത്തി എയർ ഇന്ത്യ വിജയകരമായി സർവീസ് നടത്തിയിരുന്നു. അന്താരാഷ്ട്ര യാത്രാവിപണിയിൽ വൻ വളർച്ച രേഖപ്പെടുത്തുന്ന സാഹചര്യത്തിൽ ചൈന വഴിയുള്ള പുതിയ പാത യാഥാർത്ഥ്യമാകുന്നത് ഇന്ത്യൻ വിമാനക്കമ്പനികൾക്ക് വലിയ ആശ്വാസമാകും.
