എറണാകുളം: കരിപ്പൂരിന് പിന്നാലെ നെടുമ്പാശ്ശേരിയിലും വൻ സ്വർണ വേട്ട. ഒളിപ്പിച്ച് കടത്താൻ ശ്രമിച്ച ഒന്നേകാൽ കിലോ സ്വർണം പിടികൂടി. സംഭവത്തിൽ ഒരാൾ പിടിയിലായിട്ടുണ്ട്. ഇയാളുടെ പേര് വിവരങ്ങൾ അധികൃതർ പുറത്തുവിട്ടിട്ടില്ല.
കസ്റ്റംസിന്റെ സുരക്ഷാ പരിശോധനയ്ക്കിടെയായിരുന്നു സ്വർണം പിടികൂടിയത്. ശരീരത്തിൽ ഒളിപ്പിച്ചായിരുന്നു ഇയാൾ സ്വർണം കടത്താൻ ശ്രമിച്ചത്. എന്നാൽ പരിശോധനയ്ക്കിടെ ഇത് കണ്ടെത്തുകയായിരുന്നു. മലദ്വാരത്തിൽ ഒളിപ്പിച്ചായിരുന്നു ഇയാൾ സ്വർണം കടത്താൻ ശ്രമിച്ചത്. ഇയാളിൽ നിന്നും 56 ലക്ഷം രൂപയുടെ സ്വർണമാണ് പിടിച്ചെടുത്തത് എന്ന് കസ്റ്റംസ് അധികൃതർ അറിയിച്ചു.
ശനിയാഴ്ച രാത്രിയും ഞായറാഴ്ച രാവിലെയുമായാണ് കരിപ്പൂർ വിമാനത്താവളത്തിൽ നിന്നും കസ്റ്റംസ് സ്വർണം പിടിച്ചെടുത്തത്. 1.8 കോടി രൂപയുടെ സ്വർണം ആയിരുന്നു പിടികൂടിയത്. സംഭവത്തിൽ മൂന്ന് പേരെ കസ്റ്റഡിയിൽ എടുക്കുകയും ചെയ്തിരുന്നു. അടുത്തിടെ കരിപ്പൂരിൽ ഉണ്ടായ ഏറ്റവും വലിയ സ്വർണവേട്ടയായിരുന്നു ഇത്.
