ന്യൂഡൽഹി : ഇന്ത്യയുടെ ആധുനിക ചരിത്രത്തിന് നിർണായക സംഭാവനകൾ നൽകിയത് നാല് ഗുജറാത്തികളാണെന്ന് കേന്ദ്ര ആഭ്യന്തര മന്ത്രി അമിത് ഷാ. രാഷ്ട്രപിതാവ് മഹാത്മാഗാന്ധി, സർദാർ വല്ലഭായ് പട്ടേൽ, മൊറാർജി ദേശായി, നരേന്ദ്ര മോദി എന്നിവരാണ് ആ നാല് പേർ. ഇന്ത്യയുടെ പ്രശസ്തി ലോകമെമ്പാടുമെത്താൻ കാരണം പ്രധാനമന്ത്രി നരേന്ദ്ര മോദിയെന്നും അദ്ദേഹം പറഞ്ഞു. ശ്രീ ഡൽഹി ഗുജറാത്തി സമാജിന്റെ 125 വർഷം പൂർത്തിയാകുന്ന വേളയിൽ സംഘടിപ്പിച്ച ചടങ്ങിൽ പങ്കെടുത്ത് സംസാരിക്കുകയായിരുന്നു അദ്ദേഹം.
” ഗാന്ധിജിയുടെ പ്രയത്നത്താൽ രാജ്യത്തിന് സ്വാതന്ത്ര്യം ലഭിച്ചു, സർദാർ പട്ടേലിലൂടെ രാജ്യം ഒന്നിച്ചു, മൊറാർജി ദേശായി രാജ്യത്തിന്റെ ജനാധിപത്യം പുനരുജ്ജീവിപ്പിച്ചു, നരേന്ദ്ര മോദി കാരണം ഇന്ത്യ ലോകമെമ്പാടും ആഘോഷിക്കപ്പെടുന്നു” അമിത് ഷാ പറഞ്ഞു. ഈ നാല് ഗുജറാത്തികൾ മഹത്തായ നേട്ടങ്ങൾ കൈവരിച്ചിട്ടുണ്ടെന്നും അവർ ഭാരതത്തിന്റെ അഭിമാനമാണെന്നും അദ്ദേഹം കൂട്ടിച്ചേർത്തു.
പ്രധാനമന്ത്രിയുടെ ഒമ്പത് വർഷത്തെ ഭരണത്തിൽ രാജ്യം നിരവധി നേട്ടങ്ങൾ കൈവരിച്ചിട്ടുണ്ടെന്ന് അമിത് ഷാ പറഞ്ഞു. 2014-ൽ മോദി പ്രധാനമന്ത്രിയാകുമ്പോൾ ഇന്ത്യയുടെ സമ്പദ്വ്യവസ്ഥ ലോകത്ത് 11-ാം സ്ഥാനത്തായിരുന്നു. ഇന്ന് ഒമ്പത് വർഷത്തിന് ശേഷം ഇന്ത്യൻ സമ്പദ്വ്യവസ്ഥ അഞ്ചാം സ്ഥാനത്താണ് നിൽക്കുന്നത്. മോദിയുടെ നേതൃത്വത്തിൽ ശത്രുക്കൾക്ക് നേരെ സർജിക്കൽ സ്ട്രൈക്കുകളും വ്യോമാക്രമണങ്ങളും നടത്തി. രാജ്യത്തിന്റെ അതിർത്തിയിൽ ആർക്കും കൈകടത്താൻ കഴിയില്ലെന്ന സന്ദേശമാണ് ഇതിലൂടെ ഇന്ത്യ ലോകത്തിന് നൽകിയതെന്നും അദ്ദേഹം പറഞ്ഞു.
130 കോടി ജനങ്ങളുള്ള ഇന്ത്യ പോലൊരു വലിയ രാജ്യത്ത് കൊവിഡ് വാക്സിനേഷൻ യജ്ഞം സുഗമമായി പൂർത്തിയാക്കാനായി. മോദിയുടെ നേതൃത്വത്തിൽ ഇന്ത്യ ലോകത്തിലെ ഏറ്റവും വലിയ മൊബൈൽ ഉത്പാദക രാജ്യമായി മാറി. സ്റ്റാർട്ടപ്പുകളുടെ മേഖലയിൽ ഇന്ത്യ മൂന്നാമതും, പുനരുപയോഗ ഊർജ ഉത്പാദനത്തിൽ നാലാമതുമാണെന്ന് അദ്ദേഹം പറഞ്ഞു.
ജമ്മു കശ്മീരിന് പ്രത്യേക അധികാരം നൽകിയിരുന്ന ആർട്ടിക്കിൾ 370 റദ്ദാക്കിക്കൊണ്ട് ഭീകരതയ്ക്കെതിരെ സഹിഷ്ണുതയില്ലാത്ത നയം സ്വീകരിച്ചു. അതിന്റെ ഫലമായി ഒമ്പത് വർഷത്തിനിടെ ഒരു വലിയ ഭീകരാക്രമണവും ഇവിടെ ഉണ്ടായിട്ടില്ലെന്ന് അദ്ദേഹം പറഞ്ഞു. രാജ്യത്തിന്റെ ആഭ്യന്തര സുരക്ഷയും അതിർത്തി സുരക്ഷയും ശക്തിപ്പെടുത്താൻ മോദി നിരവധി ശ്രമങ്ങൾ നടത്തിയിട്ടുണ്ട്. ”മോദി എല്ലാവരുടെയും സ്വന്തമാണ്, എല്ലാവരും അദ്ദേഹത്തിന്റേതാണ്, ഇത് എല്ലാവർക്കും അഭിമാനകരമാണ്” അമിത് ഷാ പറഞ്ഞു.
Discussion about this post