കൊച്ചി: ഓണ്‍ലൈന്‍ പെണ്‍വാണിഭ കേസിലെ പ്രധാന പ്രതി ജോഷി കീഴടങ്ങി. കൊച്ചിയില്‍ അന്വേഷണ ഉദ്യോഗസ്ഥന് മുന്നിലാണ് ഇയാള്‍ കീഴടങ്ങിയത്. ഇയാളെ തിരുവനന്തപുരത്ത് എത്തിക്കും.
പ്രായപൂര്‍ത്തിയാവാത്ത പെണ്‍കുട്ടികളെ പെണ്‍വാണിഭത്തിന് എത്തിച്ചത് ജോഷിയായിരുന്നു. പറവൂര്‍ പീഡന കേസിലെ പ്രതിയാണ് അച്ചായന്‍ എന്ന ജോഷി. എറണാകുളത്തെ റിസോര്‍ട്ടില്‍ വച്ച് പൊലീസുകാരെ കാറിടിച്ചുവീഴ്ത്തിയ ശേഷം രണ്ട് സ്ത്രീകളുമായാണ് ജോഷി രക്ഷപ്പെട്ടത്. പറവൂരില്‍ ഏഴ് വയസുകാരിയായ പെണ്‍കുട്ടിയെ പീഡിപ്പിക്കുകയും പലര്‍ക്കായി കാഴ്ചവയ്ക്കുകയും ചെയ്തകേസ് എറണാകുളം സ്‌പെഷ്യല്‍കോടതിയില്‍ വിചാരണയിലിരിക്കെയാണ് ജോഷി ഓണ്‍ലൈന്‍ പെണ്‍വാണിഭക്കേസിലെ മുഖ്യ ഇടനിലക്കാരനായത്.
അതേ സമയം ഓണ്‍ലൈന്‍ പെണ്‍വാണിഭത്തിലെ മുഴുവന്‍ പ്രതികളേയും വൈദ്യപരിശോധനയ്ക്ക് വിധേയമാക്കാന്‍ കോടതി ഉത്തരവിട്ടു. തിരുവനന്തപുരം പ്രിന്‍സിപ്പല്‍ സെഷന്‍സ് കോടതിയാണ് ഉത്തരവിട്ടത്. വൈദ്യ പരിശോധനക്ക് ശേഷം പ്രതികളുടെകസ്റ്റഡി അപേക്ഷ കോടതി പരിഗണിക്കും. പെണ്‍വാണിഭത്തിലെ പ്രധാന കണ്ണി അക്ബര്‍,രാഹുല്‍ പശുപാലന്‍, രശ്മി നായര്‍ എന്നിവരടക്കം 12 പ്രതികളാണ് പൊലീസിന്റെ പിടിയിലായത്.
Discussion about this post