രാജ്യത്ത് മൊത്തവില സൂചികയിൽ ഇടിവ് ; പണപ്പെരുപ്പം കുറഞ്ഞു; രണ്ട് വർഷത്തെ ഏറ്റവും താഴ്ന്ന നിരക്ക്

ന്യൂഡൽഹി : രാജ്യത്തെ മൊത്തവില സൂചിക അടിസ്ഥാനമാക്കിയുള്ള പണപ്പെരുപ്പം രണ്ടാം മാസവും ഇടിഞ്ഞു. ഏപ്രിൽ മാസത്തിൽ ഇത് നെഗറ്റീവ് 0.92 ശതമാനമായിരുന്നു. എന്നാൽ മെയിൽ നെഗറ്റീവ് 3.4 ശതമാനമായി ചുരുങ്ങി. കഴിഞ്ഞ വർഷം മെയിൽ ഇത് ഏറ്റവും ഉയർന്ന നിരക്കായ 16.63 ശതമാനത്തിൽ എത്തിനിൽക്കുകയായിരുന്നു. മൊത്ത ഭക്ഷ്യ സൂചിക 1.6% ആയി കുറഞ്ഞു.

25 മാസത്തിനിടെ അവശ്യവസ്തുക്കളുടെ മൊത്തവില സൂചികയിൽ ഏറ്റവും കുറവ് ഇത് ആദ്യമായാണ് രേഖപ്പെടുത്തുന്നത്. മിനറൽ ഓയിൽ, ഭക്ഷ്യവസ്തുക്കൾ, ബേസിക് മെറ്റൽസ്, വസ്ത്രങ്ങൾ, ഭക്ഷ്യേതര ഉത്പന്നങ്ങൾ എന്നിവയുടെ വില ഇടിഞ്ഞതാണ് മെയിൽ മൊത്തവില പണപ്പെരുപ്പം കുറയാൻ കാരണമായത്. ഇത് വരും മാസങ്ങളിൽ റീട്ടെയിൽ പണപ്പെരുപ്പം കുറയാനും സഹായിച്ചേക്കും.

ഇന്ധന, ഊർജ്ജ പണപ്പെരുപ്പം ഏപ്രിലിലെ 0.93 ശതമാനത്തിൽ നിന്ന് മെയ് മാസത്തിൽ നെഗറ്റീവ് 9.17 ശതമാനമായി കുറഞ്ഞു. ഭക്ഷ്യവസ്തുക്കളുടെ പണപ്പെരുപ്പം ഏപ്രിലിലെ 3.54 ശതമാനത്തിൽ നിന്ന് മെയിൽ 1.51 ശതമാനമായി കുറഞ്ഞു. രാജ്യത്തിന്റെ റീറ്റെയിൽ പണപ്പെരുപ്പവും മെയ് മാസത്തിൽ രണ്ട് വർഷത്തെ ഏറ്റവും താഴ്ന്ന നിരക്കായ 4.25 ൽ എത്തിയിരിക്കുകയാണ്.