ഇന്ത്യൻ റെയിൽവേ ചരിത്രത്തിലെ നിർണായകമായ മറ്റൊരു ചുവടുവെപ്പായി രാജ്യത്തെ ആദ്യ എൽ.എൻ.ജി അധിഷ്ഠിത ട്രെയിൻ സർവീസ് ആരംഭിച്ചു. ഗുജറാത്തിലെ സബർമതി റെയിൽവേ സ്റ്റേഷനിൽ വെച്ച് കേന്ദ്ര ആഭ്യന്തര, സഹകരണ മന്ത്രി അമിത് ഷായാണ് ട്രെയിനിന്റെ ഉദ്ഘാടനവും ഫ്ലാഗ് ഓഫും നിർവ്വഹിച്ചത്. പരമ്പരാഗതമായി ഉപയോഗിക്കുന്ന ഡീസൽ ഇന്ധനത്തെ ആശ്രയിക്കുന്നത് കുറയ്ക്കാനും, കൂടുതൽ പരിസ്ഥിതി സൗഹൃദവും ചെലവുകുറഞ്ഞതുമായ ഇന്ധന രീതികളിലേക്ക് മാറാനുമുള്ള റെയിൽവേയുടെ പരിശ്രമങ്ങളുടെ ഭാഗമായാണ് ഈ പദ്ധതി നടപ്പിലാക്കിയിരിക്കുന്നത്. അഹമ്മദാബാദ് റെയിൽവേ ഡിവിഷന്റെ കീഴിൽ സബർമതിക്കും പഠാനും ഇടയിലാണ് ആദ്യ ഘട്ടത്തിൽ ഈ ട്രെയിൻ സർവീസ് നടത്തുന്നത്.
ട്രെയിനിന്റെ ഡ്രൈവിംഗ് പവർ കാറുകളിൽ റെയിൽവേ ഇതാദ്യമായിട്ടാണ് എൽ.എൻ.ജി അടിസ്ഥാനമാക്കിയുള്ള ഇന്ധന സിസ്റ്റം ഉൾപ്പെടുത്തിയിരിക്കുന്നത്. ഈ പുതിയ ഡ്യുവൽ-ഫ്യുവൽ സാങ്കേതികവിദ്യ വഴി ഒരേ എഞ്ചിൻ ഉപയോഗിച്ച് തന്നെ ആവശ്യാനുസരണം എൽ.എൻ.ജിയിലും ഡീസലിലും ട്രെയിൻ പ്രവർത്തിപ്പിക്കാൻ സാധിക്കും. പദ്ധതിയുടെ ഭാഗമായി 1,400 ഹോഴ്സ് പവർ ശേഷിയുള്ള രണ്ട് ഡ്രൈവിംഗ് പവർ കാറുകൾ പുതിയ സിസ്റ്റത്തിലേക്ക് വിജയകരമായി മാറ്റി സ്ഥാപിച്ചു. ഉദ്ഘാടനത്തിന് മുന്നോടിയായി 2,000 കിലോമീറ്ററിലധികം ദൂരം ട്രയൽ റൺ പൂർത്തിയാക്കി ഇതിന്റെ സുരക്ഷിതത്വവും കാര്യക്ഷമതയും ഉറപ്പുവരുത്തിയിരുന്നു.
ഈ സാങ്കേതികവിദ്യ വഴി സാധാരണ ഉപയോഗിക്കുന്ന ഡീസലിന്റെ 40 ശതമാനം വരെ കുറയ്ക്കാൻ സാധിക്കും. ഓരോ ഡ്രൈവിംഗ് പവർ കാറിലും 2,200 ലിറ്റർ ശേഷിയുള്ള എൽ.എൻ.ജി ടാങ്കുകളാണ് ഇതിനായി സജ്ജീകരിച്ചിരിക്കുന്നത്. ഡീസലിനെ അപേക്ഷിച്ച് എൽ.എൻ.ജിയുടെ വില കുറവായതിനാൽ ഇന്ധനച്ചെലവിൽ വലിയ സാമ്പത്തിക ലാഭമാണ് പ്രതീക്ഷിക്കുന്നത്. എട്ട് കോച്ചുകളുള്ള ഒരു ഡി.ഇ.എം.യു ട്രെയിനിൽ എൽ.എൻ.ജി ഉപയോഗിക്കുന്നതിലൂടെ പ്രതിവർഷം ഏകദേശം 23.9 ലക്ഷം രൂപയുടെ ലാഭമുണ്ടാകുമെന്നാണ് കണക്കാക്കുന്നത്. കൂടാതെ, ഡീസൽ ഉപയോഗം കുറയുന്നതോടെ കാർബൺ പുറന്തള്ളലും വായു മലിനീകരണവും വൻതോതിൽ കുറയ്ക്കാനും കൂടുതൽ പരിസ്ഥിതി സൗഹൃദപരമായ റെയിൽവേ ഗതാഗതം ഉറപ്പാക്കാനും ഈ നീക്കം സഹായിക്കും.
