തിരുവനന്തപുരം: പ്രതിഷേധം അവസാനിപ്പിച്ച് ഡി.ജി.പി ഋഷിരാജ് സിംഗ് ജയില്‍ മധോവിയായും ലോക്‌നാഥ് ബെഹ്‌റ ഫയര്‍ഫോഴ്‌സ് മേധാവിയായും ചുമതലയേറ്റു.
നിയമനത്തില്‍ പ്രതിഷേധിച്ച് ഇരുവരും അവധിയിലായിരുന്നു. ഉത്തരവില്‍ ഒരു മാറ്റവും വരുത്തില്ലെന്ന കര്‍ശന നിലപാട് ആഭ്യന്തര വകുപ്പ് ഇരുവരെയും അറിയിച്ചിരുന്നു. ഈമാസം ഒന്നിനാണ് ഋഷിരാജ് സിംഗിനെ ഡിജിപിയായി സ്ഥാനക്കയറ്റം നല്‍കി ജയില്‍മേധാവിയായും, ലോക്‌നാഥ് ബെഹ്‌റയെ ഫയര്‍ഫോഴ്‌സ് മേധാവിയായും നിയമിച്ച് ഉത്തരവിറങ്ങിയത്.
സര്‍വീസ് ചട്ടങ്ങളുടെ ലംഘനമാണെന്ന് കാണിച്ച് രണ്ടു പേരും ആദ്യം ചുമതലയേക്കാന്‍ തയ്യാറായിരുന്നില്ല. സംഭവം വിവാദമാകുകയും ചെയ്തു. ചട്ടങ്ങള്‍ പാലിക്കാതെയുളള നിയമനം ശമ്പളത്തെയും പെന്‍ഷനെയും അടക്കം ബാധിക്കുമെന്നായിരുന്നു ഡിജിപിമാരുടെ പ്രധാനപരാതി. എന്നാല്‍ പ്രശ്‌നം പരിഹരിക്കാമെന്ന് ചീഫ് സെക്രട്ടറിയുടെ ഓഫീസ് ഉറപ്പു നല്‍കിയതിനേതുടര്‍ന്നാണ് ഇവര്‍ സ്ഥാനമേറ്റത്.
Discussion about this post