തിരുവനന്തപുരം: ഏഷ്യാനെറ്റ് ന്യൂസിന്റെ ഓഫീസിന് നേരെ ആക്രമണം. ഹൗസിംഗ്ബോർഡ് ജംഗ്ഷനിൽ പ്രവർത്തിക്കുന്ന കോർപ്പറേറ്റ് ഓഫീസിന് നേരെയാണ് ആക്രമണം ഉണ്ടായത്. സംഭവത്തിൽ രാജാജി നഗർ സ്വദേശി സൂരജ് പിടിയിലായി.
രാവിലെ അഞ്ച് മണിയോടെയായിരുന്നു സംഭവം. പാന്റ്സ് മാത്രം ധരിച്ച് കയ്യിൽ കല്ലുമായി എത്തിയ ഇയാൾ ഓഫീസിന്റെ ചില്ലുകൾ എറിഞ്ഞ് തകർക്കുകയായിരുന്നു. ഓഫീസിന് മുൻപിൽ നിർത്തിയിട്ടിരുന്ന ജീവനക്കാരുടെ കാറും കല്ലെറിഞ്ഞ് തകർത്തു. സംഭവ സമയം സെക്യൂരിറ്റി ജീവനക്കാരൻ ക്യാബിനിൽ ഉണ്ടായിരുന്നു. തലനാരിഴയ്ക്കാണ് ജീവനക്കാരൻ രക്ഷപ്പെട്ടത്. വനിതാ ജീവനക്കാർ ഉൾപ്പെടെ ജോലിയ്ക്കായി എത്തിക്കൊണ്ടിരിക്കുമ്പോഴായിരുന്നു ആക്രമണം ഉണ്ടായത്.
ആക്രമണം കണ്ട പ്രദേശവാസികളാണ് സൂരജിനെ പിടികൂടിയത്. തുടർന്ന് പോലീസിൽ ഏൽപ്പിക്കുകയായിരുന്നു. ഇത് മൂന്നാം തവണയാണ് ഓഫീസിന് നേരെ ആക്രമണം ഉണ്ടായത്. സംഭവത്തിൽ ചാനൽ അധികൃതർ പോലീസിൽ പരാതി നൽകിയിട്ടുണ്ട്. പോലീസ് എത്തി ഓഫീസിൽ പരിശോധന നടത്തി.
Discussion about this post