നാഗ്പൂർ: ഭൗതികവും ആത്മീയവുമായ പുരോഗതിയുടെ പാതയിൽ ഭാരതം ലോകത്തെ നയിക്കുമെന്ന് ആർഎസ്എസ് സർസംഘചാലക് ഡോ. മോഹൻ ഭാഗവത്. ചന്ദ്രയാൻ ദൗത്യത്തിൽ വിജയം വരിച്ച ഭാരതത്തിന്റെ ശാസ്ത്രലോകത്തിനും ഭാരത സർക്കാരിനും അഭിനന്ദനം. അഭിമാനത്തിന്റെയും സന്തോഷത്തിന്റെയും ഈ നിമിഷങ്ങൾ സമ്മാനിച്ച ശാസ്ത്രലോകത്തിന്റെ നന്ദി പറയുന്നുവെന്ന് അദ്ദേഹം പറഞ്ഞു.
ചന്ദ്രന്റെ ദക്ഷിണധ്രുവത്തിൽ ഇറങ്ങിയ ആദ്യരാഷ്ട്രമാണ് ഭാരതം. ഇത് ഭാരതത്തിന് മാത്രമല്ല, ലോകത്തിലെ മുഴുവൻ മനുഷ്യരാശിക്കും അഭിമാനിക്കാവുന്ന മുഹൂർത്തമാണ്. ലോകത്തെയാകെ വാത്സല്യം കൊണ്ട് ചേർത്തുപിടിക്കുന്ന ‘വസുധൈവ കുടുംബകം’ എന്ന ദർശനത്തിലൂടെ ഭാരതം വഴികാട്ടുകയാണ്. ലോകത്തിനാകെ സമാധാനവും ഐശ്വര്യവും പ്രദാനം ചെയ്യുന്ന ഭാരതമായി നമ്മൾ മാറുന്നു.
ജ്ഞാന, വിജ്ഞാന മേഖലകളിൽ നാം മുന്നേറും. നീലാകാശത്തിന്റെ രൂപത്തിന് പുതിയ ഭാവവും അർത്ഥവും നല്കാൻ നമുക്ക് കഴിയും. സുഖകാമനകളുടെ ലോകത്തിന് ത്യാഗത്തിന്റെ സന്ദേശം നല്കാൻ കഴിയും. അടിമത്തിന്റെ നിബിഡ മേഘങ്ങൾ വകഞ്ഞ് ആഹ്ലാദത്തിന്റെ മഴ പെയ്യിക്കും.
ഈ ലക്ഷ്യം സാക്ഷാത്കരിക്കാനാണ് രാജ്യം ആത്മവിശ്വാസത്തോടെ ഉണരുന്നത് എന്ന് അദ്ദേഹം പറഞ്ഞു.
സ്വാതന്ത്ര്യത്തിന്റെ അമൃതോത്സവ കാലത്ത് യഥാർത്ഥത്തിൽ അമൃതം വർഷിക്കുന്ന നിമിഷത്തിന് സാക്ഷികളായ നമ്മൾ ഭാഗ്യമുള്ളവരാണ്. കടമ തിരിച്ചറിഞ്ഞ് ഉണരുകയും മുന്നോട്ട് പോകുയുമാണ് ഇനി വേണ്ടത്. അതിനുള്ള കരുത്തും കുശലതയും കാഴ്ചപ്പാടും നമുക്കുണ്ട്. ഈ വിജയദിനം അത് തെളിയിക്കുന്നു. ഒരിക്കൽ കൂടി എല്ലാവരെയും ഹൃദയത്തിന്റെ അടിത്തട്ടിൽ നിന്ന് അഭിനന്ദിക്കുന്നു എന്നും സർസംഘചാലക് കുറിച്ചു.
Discussion about this post