വിവേക് രാമസ്വാമി വളരെ നല്ല സ്ഥാനാർത്ഥി; ‘മലയാളി പയ്യനെ’ പുകഴ്ത്തി ഡൊണാൾഡ് ട്രംപ്

വാഷിംഗ്ടൺ: വൈസ് പ്രസിഡന്റ് സ്ഥാനാർത്ഥിയായി റിപ്പബ്ലിക്കൻ പാർട്ടി നേതാവും ഇന്ത്യൻ വംശജനുമായ വിവേക് രാമസ്വാമിയെ പുകഴ്ത്തി മുൻ അമേരിക്കൻ പ്രസിഡന്റ് ഡൊണാൾഡ് ട്രംപ്. വൈസ് പ്രസിഡന്റ് സ്ഥാനാർത്ഥിയായി വിവേക് രാമസ്വാമി മികച്ചവനായിരിക്കും എന്ന് പറഞ്ഞ ട്രംപ്, വിവേകിനെ ശരിക്കും നല്ല വ്യക്തിയെന്നാണ് വിളിച്ചത്. 2024ലെ പ്രസിഡന്റ് തെരഞ്ഞെടുപ്പിൽ ട്രംപ് തന്റെ പങ്കാളിയായി ആരെ തിരഞ്ഞെടുക്കുമെന്ന അഭ്യൂഹങ്ങൾക്കിടയിലാണ് ഈ പ്രശംസ.

‘അവൻ വിവേക് രാമസ്വാമി, ഒരു മിടുക്കനാണ്. അവൻ ഒരു ചെറുപ്പക്കാരനാണ്. അദ്ദേഹത്തിന് ഒരുപാട് കഴിവുണ്ട്. അവൻ വളരെ, വളരെ, വളരെ ബുദ്ധിമാനായ വ്യക്തിയാണ്. അയാൾക്ക് നല്ല ഊർജ്ജമുണ്ട്, ഞാൻ നിങ്ങളോട് പറയുന്നു, അവൻ വളരെ നല്ലവനായിരിക്കുമെന്ന് ഞാൻ കരുതുന്നു. അദ്ദേഹം സ്വയം വ്യത്യസ്തനാണെന്ന് ഞാൻ കരുതുന്നുവെന്ന് ട്രംപ് പറഞ്ഞു.

ഇന്ത്യൻ വംശജനായ അമേരിക്കൻ സംരംഭകനായ വിവേക് രാമസ്വാമിയുടെ വേരുകൾ പാലക്കാട് ജില്ലയിലെ വടക്കഞ്ചേരിയിലാണ്.കോഴിക്കോട്ടെ റീജനൽ എൻജിനീയറിങ് കോളേജിൽ (ഇപ്പോൾ NIT) പഠിക്കാൻ പോകും മുൻപ് വിവേക് രാമസ്വാമിയുടെ പിതാവ് വി ഗണപതി രാമസ്വാമി വടക്കഞ്ചേരിയിലാണ് താമസിച്ചിരുന്നത്. വടക്കഞ്ചേരിയിൽ ജനിച്ച് വളർന്ന ഗണപതി രാമസ്വാമി പിന്നീട് അമേരിക്കയിലേക്ക് കുടിയേറുകയായിരുന്നു.

സംവാദത്തിന്റെ ആദ്യ മണിക്കൂറിൽ തന്നെ 4,50,000 ഡോളർ സംഭാവനയായി വിവേകിന് ശേഖരിക്കാൻ കഴിഞ്ഞു. പരമാവധി പിന്തുണക്കാരുമായി വിവേക് സംവാദങ്ങൾ നടത്തുന്നു.2024ലെ റിപ്പബ്ലിക്കൻ പ്രസിഡൻഷ്യൽ പ്രൈമറി സീസൺ ജനുവരി 15-ന് ആരംഭിക്കും. റിപ്പബ്ലിക്കൻ പ്രസിഡന്റ് സ്ഥാനാർത്ഥിക്ക് വേണ്ടിയുള്ള മത്സരത്തിലെ ഏറ്റവും പ്രായം കുറഞ്ഞ വ്യക്തിയായ 38 വയസ്സുള്ള വിവേക് രാമസ്വാമി, നിലവിൽ സ്ഥാനാർത്ഥിയെ തിരഞ്ഞെടുക്കുന്നതിൽ സുപ്രധാന പങ്കുവഹിക്കുന്ന സംസ്ഥാനമായ അയോവയിൽ പര്യടനം നടത്തുകയാണ്. ഓഗസ്റ്റ് 23 ന് റിപ്പബ്ലിക്കൻ പ്രസിഡന്റ് സ്ഥാനാർത്ഥിത്വത്തിനായുള്ള ആദ്യ ചർച്ചയിൽ വിവേക് രാമസ്വാമി മികച്ച പ്രകടനം കാഴ്ചവച്ചു. ചർച്ചയുടെ അവസാനമായപ്പോഴേക്കും, പല നിരീക്ഷകരും അദ്ദേഹത്തെ വിജയി എന്നാണ് വിശേഷിപ്പിച്ചത്.