ഇന്ത്യൻ ക്രിക്കറ്റിൻ്റെ മുൻ ക്യാപ്റ്റൻ മഹേന്ദ്രസിംഗ് ധോണിയും മുൻ അമേരിക്കൻ പ്രസിഡൻ്റ് ഡൊണാൾഡ് ട്രമ്പും ഗോൾഫ് കളിക്കുന്ന വീഡിയോയാണ് ഇപ്പോൾ സോഷ്യൽ മീഡിയയിൽ
വൈറൽ ആകുന്നത്. യു എസ് ഓപ്പൺ ടെന്നിസിൽ കാർലോസ് അൽക്കാരസും അലക്സാണ്ടർ സ്വരേവും തമ്മിൽ നടക്കുന്ന മത്സരം കാണുന്നതിനായിട്ടാണ് എം എസ് ധോണി എത്തിയത്. അതിനിടയിൽ തന്നോടൊപ്പം ഗോൾഫ് കളിക്കുന്നതിനായി ട്രംപ് ക്ഷണിക്കുകയായിരുന്നു. നാഷണൽ ഗോൾഫ് ക്ലബ് ബെഡ്മിൻസ്റ്ററിൽ ഇരുവരും ഗോൾഫ് കളിക്കുന്നതിൻ്റെ വീഡിയോയാണ് സോഷ്യൽ മീഡിയയിൽ വൈറലായി പ്രചരിക്കുന്നത്.
എം എസ് ധോണിയുടെ സുഹൃത്തും ദുബായ് ആസ്ഥാനമായുള്ള ബിസിനസ്സുകാരനുമായ ഹിതേഷ് സങ്ങ്വി യാണ് തൻ്റെ ഇൻസ്റ്റാഗ്രാം അക്കൗണ്ടിലൂടെ വീഡിയോ പങ്കുവെച്ചത്. ധോണിക്കൊപ്പം യു എസിൽ എത്തിയിരുന്ന സങ്ങ്വി ഞങ്ങൾക്ക് ആതിഥേയത്വം നൽകി സ്വീകരിച്ചതിന് മുൻപ്രസിഡൻ്റിനു നന്ദി എന്ന കുറിപ്പോടു കൂടി ട്രംപിനൊപ്പം നിൽക്കുന്ന ഫോട്ടോയും പങ്കുവെച്ചിരുന്നു.
ഈ വർഷത്തെ ഐ പി എല്ലിൽ ചെന്നൈ സൂപ്പർ കിംഗ്സിന് ധോണി അഞ്ചാം കിരീടം നേടിക്കൊടുത്തിരുന്നു. അടുത്ത വർഷത്തെ കളിയിലും പങ്കെടുക്കാൻ ആഗ്രഹിക്കുന്നു എന്ന് കളിക്ക് ശേഷം അദ്ദേഹം അറിയിച്ചിരുന്നു. ഐ പി എൽ വിജയത്തിനു ശേഷം കാലിൻ്റെ പരുക്കിനു ചികിൽസ തേടിയിരുന്ന ധോണിക്ക് ശസ്ത്രക്രിയ വിജയകരമായി പൂർത്തിയാക്കിയിരുന്നു.
Discussion about this post