ചെന്നൈ: ഇന്ത്യയുടെ സാമൂഹിക രാഷ്ട്രീയ മണ്ഡലങ്ങളിൽ കുറച്ചു ദിവസമായി വലിയ കോളിളക്കം സൃഷ്ടിച്ച ഉദയനിധി സ്റ്റാലിൻ്റെ സനാതനധർമ്മപരാമർശത്തിൽ വിമർശനവുമായി മദ്രാസ് ഹൈക്കോടതി. ഒരാൾക്ക് അനേകം കടമകൾ ചെയ്യാനുണ്ട്.ആ കടമകളുടെ സംഹിതയാണ് സനാതനധർമ്മം. അത് രാഷ്ട്രത്തോടും രാജാവിനോടും രാജാവിൻ്റെ ജനങ്ങളോടും മാതാപിതാക്കളോടും അധ്യാപകരോടും ദരിദ്രരോടും ഉള്ളതാകാം . ആ കടമകൾ ശാശ്വതമാണ്. അതിനെ നശിപ്പിക്കാനാണ് സമീപകാല സനാതനധർമ്മവിവാദങ്ങൾ ഉണ്ടാക്കുന്നവർ ശ്രമിക്കുന്നത് എന്ന് കോടതി നിരീക്ഷിച്ചു. സനാതനധർമ്മം എന്നാൽ ജാതീയതയെയും തൊട്ടുകൂടായ്മയെയും പ്രോൽസാഹിപ്പിക്കുന്നത് മാത്രമാണെന്ന ധാരണ പരത്താനാണ് ഇവർ ശ്രമിക്കുന്നത്. അതെല്ലാം എന്നേ നിയമപ്രകാരം രാജ്യത്തു നിന്ന് ഉന്മൂലനം ചെയ്തതാണ്. ഇപ്പോൾ അതിനു പ്രസക്തിയില്ലെന്നും ജസ്റ്റിസ് ശേഷസായി പറഞ്ഞു.
സംസാരിക്കാനും അഭിപ്രായം പറയാനുമു ള്ള സ്വാതന്ത്ര്യം എല്ലാവർക്കുമുണ്ട്. മൗലികാവകാശം എന്നു കരുതി അത് മറ്റുള്ളവരെ വേദനിപ്പിക്കുന്ന വിദ്വേഷപ്രസംഗമാകരുത്. മതപരമായ കാര്യങ്ങളെക്കുറിച്ചു സംസാരിക്കുമ്പോഴും സംവാദം നടത്തുമ്പോഴും പ്രത്യേകം ശ്രദ്ധിക്കണം. അത് ആരെയും വേദനിപ്പിക്കുന്നതാകരുത്. എല്ലാ മതങ്ങളും വിശ്വാസത്തിൽ അധിഷ്ഠിതമാണ്. വിശ്വാസമില്ലാത്തവർക്ക് അത് യുക്തിരഹിതമാണെന്ന് തോന്നാം. തങ്ങളുടെ പരാമർശങ്ങൾ മറ്റുള്ളവരെ എങ്ങനെ ബാധിക്കുന്നു എന്ന് അറിയണമെന്നും കോടതി പറഞ്ഞു.
ദുരാചാരങ്ങൾ പല കാലത്തും കണ്ടെന്നു വരാം. കാലം മാറുമ്പോൾ കളയെപ്പോലെ അതിനെ നശിപ്പിക്കണം.അല്ലാതെ സനാതനധർമ്മത്തെ നശിപ്പിക്കാമെന്ന് കരുതരുത്. അല്ലാത്തപക്ഷം അത് പ്രധാനവിള നശിപ്പിക്കാൻ ശ്രമിക്കുന്നതുപോലെ ആയിരിക്കും. അഭിപ്രായസ്വാതന്ത്ര്യത്തെക്കുറിച്ചു പറയുന്ന ഭരണഘടനയിൽ പോലും ആ സ്വാതന്ത്ര്യം പരിമിതപ്പെടുത്തിയിട്ടുണ്ട് എന്ന് ആർട്ടിക്കിൾ 19(2) ഉദ്ധരിച്ചുകൊണ്ട് കോടതി പരാമർശിച്ചു.
ഒരാൾ അഭിപ്രായം പറയുമ്പോൾ ആ വിഷയത്തിൽ വേണ്ടത്ര വിജ്ഞാനമുണ്ടെന്ന് ഉറപ്പു വരുത്തണം. സാമൂഹികമാധ്യമങ്ങളിലൂടെയുള്ള ആർക്കും ഏതു വിഷയത്തെക്കുറിച്ചും സംസാരിക്കാമെന്നാണ് ഇന്നത്തെ അവസ്ഥ. അല്പം ജനശ്രദ്ധ കിട്ടിയേക്കാം എന്നല്ലാതെ അതുകൊണ്ട് മറ്റു പ്രയോജനങ്ങൾ ഒന്നുമില്ല. സ്വതന്ത്രമായ അഭിപ്രായപ്രകടനം എപ്പോഴും ആരോഗ്യകരമായിരിക്കണം. അതിനു സമൂഹത്തിനു നല്ല സന്ദേശങ്ങൾ നൽകാൻ സാധിക്കും.അതുപോലെ അഭിപ്രായപ്രകടനങ്ങൾ എപ്പോഴും ഭരണഘടനയോടു കൂറു പുലർത്തുന്നതും മൂല്യങ്ങളെ ബഹുമാനിക്കുന്നതുമാകണമെന്നും കോടതി നിരീക്ഷിച്ചു.
Discussion about this post