ന്യൂഡൽഹി: ഖാലിസ്ഥാൻ ഭീകരരിൽ നിന്നും ഭീഷണി നിലനിൽക്കുന്ന സാഹചര്യത്തിൽ കാനഡയിലെ ഇന്ത്യൻ വിദ്യാർത്ഥികൾക്കായി മാർഗ്ഗ നിർദ്ദേശങ്ങൾ പുറപ്പെടുവിച്ച് കേന്ദ്രസർക്കാർ. ജാഗ്രത പാലിക്കാൻ വിദ്യാർത്ഥികളോട് സർക്കാർ ആവശ്യപ്പെട്ടു. ഖാലിസ്ഥാൻ ഭീകരൻ നിജ്ജാറിന്റെ കൊലപാതകവുമായി ബന്ധപ്പെട്ട തർക്കങ്ങൾക്കിടെ ഇന്ത്യയിലുള്ള വിദ്യാർത്ഥികൾക്കായി കനേഡിയൻ സർക്കാർ മാർഗ്ഗ നിർദ്ദേശങ്ങൾ പുറപ്പെടുവിച്ചിരുന്നു. ഇതിന് പിന്നാലെയാണ് കേന്ദ്രസർക്കാരും നിർദ്ദേശം പുറപ്പെടുവിച്ചത്.
കാനഡയിൽ ഇന്ത്യ വിരുദ്ധ പ്രവർത്തനങ്ങൾ വർദ്ധിച്ചുവരുന്ന സാഹചര്യത്തിൽ വിദ്യാർത്ഥികൾ ജാഗ്രത പാലിക്കണമെന്ന് മാർഗ്ഗ നിർദ്ദേശത്തിൽ വ്യക്തമാക്കുന്നു. അനാവശ്യമായി പുറത്തിറങ്ങുകയോ യാത്ര ചെയ്യുകയോ അരുത്. യാത്ര ചെയ്യുന്നവർ ജാഗ്രത പാലിക്കണം. സംഘർഷ ബാധിത മേഖലകളിലേക്കുള്ള യാത്രകൾ ഒഴിവാക്കണം. വിദ്യാർത്ഥികളുടെയും ഇന്ത്യൻ സമൂഹത്തിന്റെയും സുരക്ഷ ഉറപ്പാക്കുന്നതിന് വേണ്ടി കനേഡിയൻ അധികൃതരുമായി നിരന്തരം ബന്ധപ്പെടുന്നുണ്ടെന്നും സർക്കാർ അറിയിച്ചു.
ഒട്ടാവയിലെ ഇന്ത്യൻ കൗൺസിലിൽ ഇന്ത്യൻ വിദ്യാർത്ഥികളും പൗരന്മാരും രജിസ്റ്റർ ചെയ്യണം. അടിയന്തര സാഹചര്യങ്ങളിൽ സഹായത്തിനായി എജർജൻസി നമ്പറിൽ ബന്ധപ്പെടണമെന്നും നിർദ്ദേശത്തിലുണ്ട്.
