ന്യൂഡൽഹി : കോൺഗ്രസിന്റെ പുതിയ ട്രഷററായി അജയ് മാക്കനെ നിയമിച്ചു. ജനറൽ സെക്രട്ടറി കെ സി വേണുഗോപാലാണ് പുതിയ ട്രഷററായി അജയ് മാക്കനെ നിയമിച്ച വിവരം വെളിപ്പെടുത്തിയത്. പവൻ കുമാർ ബൻസാൽ സ്ഥാനമൊഴിഞ്ഞതോടെയാണ് അജയ് മാക്കൻ പുതിയ ട്രഷററായി എത്തുന്നത്.
സ്ഥാനമൊഴിയുന്ന ട്രഷറർ പവൻ കുമാർ ബൻസാലിന്റെ സംഭാവനകളെ വേണുഗോപാൽ അഭിനന്ദിച്ചു. മുതിർന്ന കോൺഗ്രസ് നേതാവായിരുന്ന അഹമ്മദ് പട്ടേലിന്റെ മരണശേഷം 2020 നവംബറിലാണ് ബൻസാൽ കോൺഗ്രസിന്റെ ഇടക്കാല ട്രഷററായി നിയമിതനായത്.
അജയ് മാക്കന്റെ നിയമനം ഉടനടി പ്രാബല്യത്തിൽ വരുമെന്നും എഐസിസി പുറത്തിറക്കിയ വാർത്താക്കുറിപ്പ് വ്യക്തമാക്കി.
ലോക്സഭാ തെരഞ്ഞെടുപ്പിന് മാസങ്ങൾ മാത്രം ബാക്കി നിൽക്കെയാണ് കോൺഗ്രസിന്റെ ഈ നടപടി. മുൻ കേന്ദ്രമന്ത്രിയായിരുന്ന അജയ് മാക്കൻ നേരത്തെ ഡൽഹി യൂണിറ്റ് മേധാവിയായി സേവനമനുഷ്ഠിച്ചിട്ടുണ്ട്. ഡൽഹിയിലെ ഷീലാ ദീക്ഷിത് സർക്കാരിൽ മന്ത്രിയുമായിരുന്നു അജയ് മാക്കൻ.
