തൊടുപുഴ: മൂന്നാറില്‍ ദൗത്യസംഘമെത്തിയാലും ഇടിച്ചുനിരത്തല്‍ ഉണ്ടാകില്ലെന്ന് എം.എം. മണി എംഎല്‍എ. പിണറായി വിജയന്‍ ജനദ്രോഹ നിലപാട് സ്വീകരിക്കുമെന്ന് തോന്നുന്നില്ലെന്നും അങ്ങനെയുണ്ടായാല്‍ ജനങ്ങളെ അണിനിരത്തി ചെറുക്കും. വി എസ് അച്യുതാനന്ദന്‍ മുഖ്യമന്ത്രിയായിരുന്ന കാലത്ത് തോന്നുംപടി ചെയ്തതിന്റെയാണ് ഇന്ന് അനുഭവിക്കുന്നതെന്നും എം എം മണി പറഞ്ഞു.
“ഇപ്പോള്‍ മുഖ്യമന്ത്രി പിണറായി വിജയനും റവന്യൂമന്ത്രി കെ. രാജനുമാണ്. അവര്‍ അങ്ങനെ ചെയ്യുമെന്ന് തോന്നുന്നില്ല. വീടുകളോ കടകളോ പൊളിക്കുന്നത് എല്‍ഡിഎഫിന്റെ നയമല്ലെ. കയ്യേറ്റം ന്യായമായി പരിശോധിച്ച് അതിന്റെ കാര്യങ്ങള്‍ ചെയ്യാം. അതും ഇടിച്ചുപൊളിക്കുക ഒന്നുമായിരിക്കില്ല
മിക്കവാറും. വരുന്ന ഉദ്യോഗസ്ഥന്മാര്‍ അവര്‍ക്കു തോന്നുന്നതുപോലെ ചെയ്താല്‍ നമ്മള്‍ എതിര്‍ക്കും. ജനങ്ങളെ അണിനിരത്തി ചെറുക്കും. ആ കാര്യത്തില്‍ ഒരു സംശയവും ഇല്ല”, മണി വ്യക്തമാക്കി.
സര്‍ക്കാരിന്റെ കാര്യത്തില്‍ സര്‍ക്കാര്‍ നോക്കണം. ഒരു സേനയെ വച്ചെന്നതുകൊണ്ട് അന്നത്തെപോലെ ഇന്നു ചെയ്യുമെന്നു കരുതുന്നില്ല. അന്നു വന്ന് തോന്നുംപോലെ ഇടിച്ചുനിരത്തിയതിന്റെ ഫലം ഇന്ന് അനുഭവിച്ചുകൊണ്ടിരിക്കുകയാണ്. കാരണം കേസുകളെല്ലാം തോറ്റുകൊണ്ടിരിക്കുകയാണ്. സര്‍ക്കാര്‍ കോടിക്കണക്കിനു രൂപ നഷ്ടം കൊടുക്കേണ്ടിവരും. നിയമം പാലിച്ച് കാര്യങ്ങള്‍ ചെയ്യേണ്ടതുപോലെ ചെയ്യാതെ തോന്നും പോലെ കാര്യങ്ങള്‍ ചെയ്തതിന്റെയാണതെന്നും അദ്ദേഹം കൂട്ടിച്ചേര്‍ത്തു.
