കോട്ടയം : കേരള പേപ്പര് മില്ലില് വൻ തീ പിടിത്തം. കോട്ടയം വെള്ളൂരിൽ സ്ഥിതി ചെയ്യുന്ന കേരള പേപ്പർ പ്രൊഡകട്സ് ലിമിറ്റഡിൻ്റെ പേപ്പര് മില്ലിലാണ് തീ പിടിത്തം ഉണ്ടായിരിക്കുന്നത്. സംഭവസമയത്ത് പേപ്പർ മില്ലിൽ ജോലി ചെയ്യുകയായിരുന്ന രണ്ട് തൊഴിലാളികൾക്ക് പൊള്ളലേറ്റു.
പേപ്പർ മില്ലിന്റെ നിർമ്മാണ യൂണിറ്റിനുള്ളിൽ ആയിരുന്നു തീപിടുത്തമുണ്ടായത്. മെഷീൻ്റെ മുകള് ഭാഗവും യന്ത്രസാമഗ്രികളും പേപ്പർ നിർമ്മിക്കുന്നതിനുള്ള അസംസ്കൃത വസ്തുക്കളും നിർമ്മിച്ചുവച്ചിരുന്ന പേപ്പറുകളും പൂർണമായി കത്തിനശിച്ചു.
വൈകിട്ട് ആറ് മണിയോടെയാണ് കേരള പേപ്പർ മില്ലിൽ തീപിടിത്തമുണ്ടായത്. ഈ സമയം ജോലി ചെയ്തിരുന്ന രണ്ട് ജീവനക്കാർക്കാണ് പൊള്ളലേറ്റിട്ടുള്ളത്. തീപിടുത്തത്തിന്റെ വിവരം ലഭിച്ചതിനെ തുടർന്ന് 8 അഗ്നിശമന സേനാ യൂണിറ്റുകൾ സ്ഥലത്തെത്തിയിട്ടുണ്ട്. തീയണയ്ക്കാനുള്ള ശ്രമം തുടർന്നുകൊണ്ടിരിക്കുകയാണ്.
