ന്യൂഡല്ഹി : ഇന്ത്യ സാറ്റലൈറ്റ് കമ്മ്യൂണിക്കേഷന് രംഗത്ത് വന് കുതിപ്പ് നടത്തുന്നതായി ഭാരതി എന്റര്പ്രൈസസിന്റെ ചെയര്മാനും ഭാരതി എയര്ടെല്ലിന്റെ സ്ഥാപകനുമായ സുനില് ഭാരതി മിത്തല്. രാജ്യത്തെ ഓരെ ഇഞ്ചും ഇന്ന് സാറ്റലൈറ്റ് പരിധിയിലാണെന്നും അതിനാല് ഡിജിറ്റല് വിഭജനം ഇല്ലതെയാകുമെന്നും അദ്ദേഹം പറഞ്ഞു. ഇന്ത്യ മൊബൈല് കോണ്ഗ്രസിന്റെ ഏഴാം പതിപ്പില് സംസാരിക്കുകയായിരുന്നു അദ്ദേഹം.
“ഇന്ത്യയുടെ സാറ്റലൈറ്റ് കമ്മ്യൂണിക്കേഷന് രംഗത്ത് വന് കുതിപ്പാണ് ഉണ്ടായിരിക്കുന്നത്. നമ്മുടെ രാജ്യത്തിന്റെ ഓരോ ഇഞ്ചും സേവിക്കാന് കഴിയുന്ന സാറ്റലൈറ്റ് കമ്മ്യൂണിക്കേഷന് ഇവിടെ നിലവില് വന്നു. ഐഎസ്ആര്ഒയുമായുള്ള വിജയകരമായ സഹകരണമാണ് ഈ നേട്ടത്തിന് കാരണമായത്. ഐഎസ്ആര്ഒയുടെ രണ്ട് റോക്കറ്റുകള് ജിഎസ്എല്വി എംകെ 3 നേടാന് കഴിഞ്ഞതിലൂടെ 72 ഉപഗ്രഹങ്ങളാണ് ഞങ്ങള് കഴിഞ്ഞ വര്ഷം വിക്ഷേപിച്ചത്”, മിത്തല് പറഞ്ഞു.
അടുത്ത മാസം മുതല്, അഭൂതപൂര്വമായ കണക്റ്റിവിറ്റി യുഗത്തിനാണ് ഇന്ത്യ സാക്ഷ്യം വഹിക്കുകയെന്നും അദ്ദേഹം വ്യക്തമാക്കി. രാജ്യത്ത് എവിടെയും, വിദൂരമോ ദുഷ്കരമോ ആയ ഏത് പ്രദേശങ്ങളിലുള്ള ആരെയും ബന്ധിപ്പിക്കാന് ഗുജറാത്തിലെ മെഹ്സാനയില് സ്ഥാപിച്ചിട്ടുള്ള ഞങ്ങളുടെ സാറ്റലൈറ്റ് ഗ്രൗണ്ട് സ്റ്റേഷനില് നിന്ന് സാധിക്കും. സാറ്റലൈറ്റ് ആശയവിനിമയത്തിലെ ഈ സാങ്കേതിക മുന്നേറ്റം ഇന്ത്യയിലെ ഡിജിറ്റല് വിഭജനം പരിഹരിക്കും. ഏറ്റവും ഒറ്റപ്പെട്ട പ്രദേശങ്ങളെപ്പോലും ബന്ധിപ്പിക്കുന്നതിലൂടെ വലിയ വികസനമാണ് ഉണ്ടാവുക. ഇത് രാഷ്ട്രത്തിന്റെ ആശയവിനിമയ രീതിയെ പരിവര്ത്തനം ചെയ്യുമെന്ന് വാഗ്ദാനം ചെയ്യുന്നു. കണക്റ്റിവിറ്റി, ആശയവിനിമയം, പുരോഗതി എന്നിവയ്ക്കുള്ള വലിയ സാധ്യതകളുടെ ലോകമാണ് ഇന്ത്യക്ക് മുന്നില് തുറക്കപ്പെടുന്നതെന്നും മിത്തല് കൂട്ടിച്ചേര്ത്തു.
ഇന്ത്യയുടെ ഡിജിറ്റല് ഇന്ഫ്രാസ്ട്രക്ചറിന് ലോക സമ്പദ്വ്യവസ്ഥയെ എങ്ങനെ ത്വരിതപ്പെടുത്താന് കഴിയുമെന്നതിനെക്കുറിച്ചും ഭാരതി എന്റര്പ്രൈസസ് ചെയര്മാന് സംസാരിച്ചു.
“ഇന്ത്യ മൊബൈല് കോണ്ഗ്രസ് 2023 ന് രണ്ട് നെടും തൂണുകളാണുള്ളത്. ആദ്യത്തേത് ഡിജിറ്റല് ഇന്ത്യയായിരുന്നു. നമ്മള് ജാം ട്രിനിറ്റി എന്ന മുദ്രാവാക്യം ഉയര്ത്തി. ജന്ധന്, ആധാര്, മൊബൈല് എന്നിവയെ അടിസ്ഥാനമാക്കിയുള്ള വികസനം ലോകമെമ്പാടും ചര്ച്ച ചെയ്യപ്പെടുന്നു. ലോകബാങ്ക്, യുഎന്, ഡബ്ല്യുടിഒ, ആഫ്രിക്കന് യൂണിയന്, യൂറോപ്യന് രാഷ്ട്രം, ജി 20, ഒഇസിഡി രാജ്യങ്ങള്, അല്ലെങ്കില് ബ്രിക്സ് എന്നിവരൊക്ക ഇന്ത്യ നിര്മ്മിച്ച ഡിജിറ്റല് ഇന്ഫ്രാസ്ട്രക്ചറിന് ലോക സമ്പദ്വ്യവസ്ഥയെ ത്വരിതപ്പെടുത്താന് കഴിയുമെന്ന് ഇന്ന് അംഗീകരിക്കുന്നു. രണ്ടാമത്തേത് മെയ്ക്ക് ഇന് ഇന്ത്യ പദ്ധതിയാണ്”, സുനില് ഭാരതി മിത്തല് പറഞ്ഞു.
രാജ്യത്തിന്റെ ഡിജിറ്റല് ഭാവിയെക്കുറിച്ചുള്ള ചര്ച്ചകള് സുഗമമാക്കുന്നതിനൊപ്പം ഇന്ത്യയുടെ സാങ്കേതിക മുന്നേറ്റങ്ങളും നൂതനത്വങ്ങളും പ്രദര്ശിപ്പിക്കുന്നതിനുള്ള ഒരു വേദിയായി ഇന്ത്യ മൊബൈല് കോണ്ഗ്രസ് പ്രവര്ത്തിക്കുന്നതായും അദ്ദേഹം അഭിപ്രായപ്പെട്ടു.
Discussion about this post