തിരുവനന്തപുരം : ശ്രീലങ്കയ്ക്കും കോമറിൻ മേഖലയ്ക്കും മുകളിലായി ചക്രവാതച്ചുഴി രൂപപ്പെട്ടിട്ടുള്ളതായി കേന്ദ്ര കാലാവസ്ഥാ വകുപ്പ്. തൽഫലമായി കേരളത്തിൽ ശനിയാഴ്ച വരെ ഒറ്റപ്പെട്ട സ്ഥലങ്ങളിൽ ശക്തമായ മഴയ്ക്ക് സാധ്യതയുള്ളതായി കാലാവസ്ഥ വകുപ്പിന്റെ മുന്നറിയിപ്പിൽ പറയുന്നു.
ബംഗാൾ ഉൾക്കടലിൽ നിന്നും തെക്കേ ഇന്ത്യയിലേക്ക് വീശുന്ന കിഴക്കൻ കാറ്റും വടക്കു കിഴക്കൻ കാറ്റും കേരളം അടക്കമുള്ള പ്രദേശങ്ങളിൽ മഴയ്ക്ക് കാരണമാകാം. കാലാവസ്ഥ വകുപ്പിന്റെ മഴ മുന്നറിയിപ്പ് കണക്കിലെടുത്ത് വിവിധ ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.
കേരള, കർണാടക സമുദ്ര തീരങ്ങളിലും ലക്ഷദ്വീപിലും മത്സ്യബന്ധനത്തിന് തടസ്സമില്ലെന്നും കാലാവസ്ഥ വകുപ്പിന്റെ അറിയിപ്പുണ്ട്. കേരള തീരങ്ങളിലെയും തെക്കൻ തമിഴ്നാട് തീരങ്ങളിലെയും ചില മേഖലകളിൽ ശക്തമായ തിരമാലയ്ക്ക് സാധ്യതയുള്ളതായും മുന്നറിയിപ്പിൽ പറയുന്നുണ്ട്. അപകടമേഖലയിൽ ഉള്ളവർ ജാഗ്രത പുലർത്തണമെന്നും കാലാവസ്ഥ വകുപ്പ് അറിയിച്ചു.
Discussion about this post