ന്യൂഡല്‍ഹി: കാത്തിരിപ്പുകൾക്കൊടുവിൽ വാട്‌സ്ആപ്പിൽ വോയിസ് ചാറ്റ് ഫീച്ചർ എത്തുന്നു. ഗ്രൂപ്പിൽ മെസേജ് ചെയ്യുന്നതിനോടൊപ്പം ഗ്രൂപ്പിലെ അംഗങ്ങൾക്ക് കോൾ കോൺഫറൻസ് മാതൃകയിൽ തത്സമയം ഒരുമിച്ച് പരസ്പരം സംസാരിക്കാൻ അനുവദിക്കുന്ന തരത്തിലാണ്. വലിയ ഗ്രൂപ്പുകളിലാണ് ഈ ഫീച്ചര്‍ കൂടുതല്‍ പ്രയോജനം ചെയ്യുക. വലിയ ഗ്രൂപ്പുകളിൽ എല്ലാവരും ഒരേസമയം ഗ്രൂപ്പ് കോളുകളിൽ പങ്കെടുക്കണമെന്നില്ല. ഇതിന് പരിഹാരമാണ് പുതിയ ഫീച്ചർ.
വോയിസ് ചാറ്റ് തുടങ്ങുമ്പോൾ തന്നെ മറ്റ് ഗ്രൂപ്പ് അംഗങ്ങൾക്ക് പുഷ് നോട്ടിഫിക്കേഷൻ ലഭിക്കും. ഗ്രൂപ്പ് ചാറ്റിൽ പങ്കെടുക്കുന്നതിനായി ബന്ധപ്പെട്ട അറിയിപ്പാണ് പുഷ് നോട്ടിഫിക്കേഷൻ മുഖാന്തരം ഉപയോക്താക്കൾക്ക് ലഭിക്കുക. ഇതിനോടൊപ്പം പ്രത്യേക ഇൻ ചാറ്റ് ബബിളും ഒരുക്കുന്നതാണ്. ഇത് ടാപ്പ് ചെയ്യുന്നതിലൂടെ ഉപയോക്താക്കൾക്ക് എളുപ്പത്തിൽ വോയിസ് ചാറ്റിൽ പങ്കെടുക്കാൻ സാധിക്കും. സ്ക്രീനിന്റെ അടിയിൽ നൽകിയിരിക്കുന്ന ബാനറിലൂടെ ആരെല്ലാം വോയിസ് ചാറ്റിൽ ചേർന്നിട്ടുണ്ടെന്ന് അറിയാൻ സാധിക്കും. 33 മുതൽ 128 പേർ വരെ അംഗങ്ങളായ ഗ്രൂപ്പുകളിൽ വോയിസ് ചാറ്റ് ലഭ്യമാകുന്നതാണ്. എന്നാൽ, ഒരേസമയം 32 പേർക്ക് മാത്രമേ വോയിസ് ചാറ്റിൽ പങ്കെടുക്കാൻ സാധിക്കുകയുള്ളൂ.
ചാറ്റില്‍ നിന്ന് എല്ലാവരും പോകുന്നതിന് അനുസരിച്ച് വോയ്സ് ചാറ്റ് ഓട്ടോമാറ്റിക്കായി അവസാനിക്കും. 60 മിനിറ്റിനുള്ളില്‍ ആരും പങ്കെടുത്തില്ലെങ്കിലും ചാറ്റ് സ്വാഭാവികമായി അവസാനിക്കും. ഒരേസമയം ടെക്സ്റ്റ് മെസേജിങ്ങും സാധിക്കുന്ന തരത്തിലാണ് ഈ ഫീച്ചര്‍ ക്രമീകരിച്ചിരിക്കുന്നത്. വരും ആഴ്ചകളില്‍ തന്നെ പുതിയ ഫീച്ചര്‍ ലഭ്യമാവുമെന്നാണ് വിവരം.
