മലപ്പുറം : മൃതദേഹം സംസ്കരിക്കാനായി കുഴിയെടുക്കുന്നതിനിടയിൽ യുവാവ് കുഴഞ്ഞുവീണു മരിച്ചു. മലപ്പുറം എടക്കരയിലാണ് സംഭവം. ശ്മശാന ജീവനക്കാരനാണ് കുഴിയെടുക്കുന്നതിനിടയിൽ കുഴഞ്ഞുവീണ് മരിച്ചത്.
എടക്കര തമ്പുരാന്‍കുന്ന് അരീക്കോടന്‍ സുനില്‍ (46) ആണ് മരണപ്പെട്ടത്. പാലുണ്ട പേട്ടക്കുന്നിലെ ശ്മശാനത്തിലെ ജീവനക്കാരൻ ആയിരുന്നു സുനിൽ. ഇവിടെ സംസ്കരിക്കാനായി കൊണ്ടുവന്ന മൃതദേഹത്തിന് വേണ്ടി കുഴിയെടുക്കുക പെട്ടെന്ന് സുനിലിന് നെഞ്ചുവേദന അനുഭവപ്പെടുകയായിരുന്നു.
ചൊവ്വാഴ്ച രാവിലെ ഒമ്പതോടെ ആയിരുന്നു സംഭവം നടന്നത്. നെഞ്ചുവേദനയെ തുടർന്ന് കുഴഞ്ഞുവീണ സുനിലിനെ ഉടന്‍ തന്നെ എടക്കരയിലെ സ്വകാര്യ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. എടക്കര ഗ്രാമപഞ്ചായത്തിലെ താല്‍ക്കാലിക ശുചീകരണ തൊഴിലാളി കൂടിയാണ് മരണപ്പെട്ട സുനിൽ.
