തലശ്ശേരി: നവ കേരള സദസ്സ് പര്യടനത്തിനിടെ തലശ്ശേരിയില് വച്ച് മന്ത്രിസഭാ യോഗം. കൊച്ചിയില് ബിപിസിഎല് ജൈവമാലിന്യ പ്ലാന്റിന് മന്ത്രിസഭാ യോഗത്തില് അനുമതി. നഗരത്തിലെ ജൈവ മാലിന്യ പ്രശ്നത്തിന് ശാശ്വത പരിഹാരമാകുന്ന കംപ്രസ്ഡ് ബയോഗ്യാസ് പ്ലാന്റ് നിര്മ്മിക്കാനാണ് ബിപിസിഎല്ലിന് മന്ത്രിസഭ അനുമതി നല്കിയിരിക്കുന്നത്.
ഇതിനായി കൊച്ചി കോര്പ്പറേഷന്റെ കൈവശമുള്ള ബ്രഹ്മപുരത്തെ ഭൂമിയില്നിന്ന് 10 ഏക്കര് ബിപിസിഎല്ലിന് കൈമാറും. ഈ ഭൂമിയിലാവും പ്രതിദിനം 150 മെട്രിക് ടണ് മാലിന്യം സംസ്കരിക്കാന് ശേഷിയുള്ള പ്ലാന്റ് സ്ഥാപിക്കുക. പ്ലാന്റില് നിന്നും ഉത്പാദിപ്പിക്കുന്ന കംപ്രസ്ഡ് ബയോഗ്യാസ് ബിപിസിഎല് ഉപയോഗിക്കും. ഏകദേശം 150 കോടി രൂപയാണ് പദ്ധതിയുടെ നിര്മ്മാണ ചെലവ്. ഈ തുക പൂര്ണമായും ബിപിസിഎല് ആണ് വഹിക്കുക.
അതേസമയം, പ്ലാന്റ് നിര്മ്മാണത്തിന് ആവശ്യമായ ജലം, വൈദ്യുതി എന്നിവ കുറഞ്ഞ നിരക്കില് ലഭ്യമാക്കുമെന്ന് മന്ത്രി സഭ വ്യക്തമാക്കി. 15 മാസത്തിനകം പദ്ധതി പൂര്ത്തിയാവും. പ്ലാന്റില് ഉല്പാദിപ്പിക്കുന്ന ജൈവവളം കര്ഷകര്ക്ക് ലഭ്യമാക്കാനും പദ്ധതിയുണ്ട്. കൂടാതെ മാലിന്യ സംസ്കരണത്തിന്റെ ഭാഗമായി ഉണ്ടാകുന്ന മലിനജലം സംസ്കരിച്ച് ശുദ്ധമായ ജലം മാത്രമേ പുറത്തുവിടുകയുള്ളൂ.
സംസ്കരണത്തിനു ശേഷം ബാക്കിയാവുന്ന അജൈവമാലിന്യം ക്ലീന് കേരള കമ്പനി ഏറ്റെടുത്ത് സംസ്കരിക്കും. ഏഴ് ലക്ഷത്തിനടുത്ത് ജനസംഖ്യയും 1,61,000 ല് അധികം വീടുകള് ഉള്ള കൊച്ചി കോര്പ്പറേഷനിലെ ജൈവമാലിന്യ പ്രശ്നത്തിന് കംപ്രസ്ഡ് ബയോഗ്യാസ് പ്ലാന്റ് പരിഹാരമാകുമെന്ന് മുഖ്യമന്ത്രിയുടെ ഓഫീസ് പുറത്തിറക്കിയ വാര്ത്താക്കുറിപ്പില് പറയുന്നു.
കൂടാതെ ബ്രഹ്മപുരം മാലിന്യ സംസ്കരണ പ്ലാന്റില് അഗ്നിശമന പ്രവര്ത്തനങ്ങളില് ഏര്പ്പെട്ട 387 സിവില് ഡിഫന്സ് വളണ്ടിയര്മാര്ക്ക് ധനസഹായം നല്കാനും സര്ക്കാര് തീരുമാനം. ബ്രഹ്മപുരത്ത് അഗ്നിശമന പ്രവര്ത്തനങ്ങളില് ഏര്പ്പെട്ട ദിവസങ്ങള്ക്ക് ദിനം ഒന്നിന് ആയിരം രൂപ വീതം പ്രചോദന ധനസഹായം അനുവദിക്കാനാണ് തീരുമാനിച്ചിരിക്കുന്നത്.
Discussion about this post