എറണാകുളം: നവകേരള സദസ്സിൽ വിദ്യാർത്ഥികളെ പങ്കെടുപ്പിച്ചതിനെതിരെ രൂക്ഷവിമർശനവുമായി ഹൈക്കോടതി. കുഞ്ഞുമനസ്സുകളിലേക്ക് ആരും രാഷ്ട്രീയം കുത്തിവയ്ക്കേണ്ടെന്ന് ഹൈക്കോടതി പറഞ്ഞു. കോടതി വിലക്കിയിട്ടും കുട്ടികളെ പങ്കെടുപ്പിച്ചതാണ് ഹൈക്കോടതിയെ ചൊടിപ്പിച്ചത്. ഇനി ഇത് ആവർത്തിച്ചാൽ കടുത്തനടപടിയിലേക്ക് കടക്കുമെന്നും കോടതി മുന്നറിയിപ്പ് നൽകി.
നവകേരള സദസിൽ വിദ്യാർത്ഥികളെ പങ്കെടുപ്പിക്കുന്നത് രാഷ്ട്രീയമാണ്. ഇത്ര
ചെറുപ്പത്തിൽ മനസുകളിലേക്ക് രാഷ്ട്രീയം കുത്തിവക്കണ്ട. അവർ വളരട്ടെ. എല്ലാവർക്കും രാഷ്ട്രീയം ഉണ്ടായിക്കോളുമെന്നും കോടതി പറഞ്ഞു. നവകേരള സദസ്സിൽ കോടതി ഉത്തരവ് ലംഘിച്ച് കുട്ടികളെ പങ്കെടുപ്പിച്ചതിൽ എം.എസ്.എഫ് സംസ്ഥാന പ്രസിഡന്റ് പി.കെ.നവാസ് സമർപ്പിച്ച ഉപഹർജി ഹൈക്കോടതി ഇന്ന് പരിഗണിച്ചിരുന്നു. ഇതിലാണ് പരാമർശം. ഹർജി അടുത്ത ആഴച്ച വീണ്ടും പരിഗണിക്കും.
മലപ്പുറം എടപ്പാളിലാണ് നവകേരള സദസിനെത്തിയ മുഖ്യമന്ത്രിയേയും മന്ത്രിമാരേയും അഭിവാദ്യം ചെയ്യാനായി കുട്ടികളെ പൊരിവെയിലിൽ വഴിവക്കിൽ മണിക്കൂറുകളോളം നിർത്തിയത്. സംഭവത്തിൽ ബാലാവകാശ കമ്മീഷൻ കേസ് എടുത്തിരുന്നു.
