പത്തനംതിട്ട : മുഖ്യമന്ത്രി പിണറായി വിജയനെതിരായ പ്രതിഷേധം ആകാശത്തേക്കും വ്യാപിപ്പിച്ച് യൂത്ത് കോൺഗ്രസ്. കറുത്ത ബലൂണുകളിൽ കരിങ്കൊടി കെട്ടി പറത്തി വിട്ടായിരുന്നു മുഖ്യമന്ത്രിക്ക് നേരെ പത്തനംതിട്ടയിൽ യൂത്ത് കോൺഗ്രസ് പ്രതിഷേധമുയർത്തിയത്.
പത്തനംതിട്ട ആറന്മുള മണ്ഡലത്തിലെ നവകേരള സദസ്സ് നടക്കുന്ന ജില്ലാ സ്റ്റേഡിയത്തിന് സമീപത്താണ് പ്രതിഷേധ സൂചകമായി കറുത്ത ബലൂൺ പറത്തിയത്. കറുത്ത ബലൂണുകൾക്കൊപ്പം കരിങ്കൊടിയും യൂത്ത് കോൺഗ്രസ് പതാകയും ഇത്തരത്തിൽ പറത്തിവിട്ടു. മുഖ്യമന്ത്രിക്ക് നേരെ സംസ്ഥാന വ്യാപകമായി പ്രതിഷേധങ്ങൾ നടത്തുമെന്ന് യൂത്ത് കോൺഗ്രസ് നേരത്തെ വ്യക്തമാക്കിയിരുന്നു.
കഴിഞ്ഞദിവസം ആലപ്പുഴയിൽ മുഖ്യമന്ത്രിയുടെ സുരക്ഷാ ഉദ്യോഗസ്ഥനും ഗണ്മാനും യൂത്ത് കോൺഗ്രസ് പ്രവർത്തകരെ മർദ്ദിച്ചതിൽ പ്രതിഷേധിച്ച് മുഖ്യമന്ത്രിക്ക് എതിരായ പ്രതിഷേധങ്ങൾ കൂടുതൽ ശക്തമാക്കുകയാണ് യൂത്ത് കോൺഗ്രസ്. ആറമ്മുളയ്ക്ക് ശേഷം റാന്നി, കോന്നി, അടൂർ മണ്ഡലങ്ങളിലാണ് കേരള സദസ്സ് നടക്കാനിരിക്കുന്നത്. ഇവിടങ്ങളിലും ഈ രീതിയിൽ പ്രതിഷേധം തുടരുമെന്നാണ് സൂചന.
Discussion about this post