തിരുവനന്തപുരം: സംസ്ഥാനത്ത് കൊവിഡ് കേസുകളുടെ എണ്ണം കുതിച്ചുയരുന്നു. ഇന്നലെ മാത്രം 111 പേർക്കാണ് സംസ്ഥാനത്ത് കൊവിഡ് ബാധിച്ചത്. ഒരു മരണവും കൊവിഡ് രോഗബാധ മൂലം കേരളത്തിൽ സ്ഥിരീകരിച്ചതായി കേന്ദ്ര ആരോഗ്യ മന്ത്രാലയം അറിയിച്ചു.
ഇന്നലെ രാജ്യത്ത് ആകെ സ്ഥിരീകരിച്ചത് 122 കൊവിഡ് കേസുകളാണ്. ഇതോടെ രാജ്യത്തെ ആകെ ആക്ടീവ് കേസുകളുടെ എണ്ണം 1828 ആയി. ഇതിൽ 1634 കേസുകളും കേരളത്തിലാണ് എന്നത് ആശങ്കാജനകമാണ്.
അമേരിക്കയിൽ ആദ്യം സ്ഥിരീകരിക്കുകയും ചൈനയിൽ അതിവേഗ വ്യാപനത്തിന് കാരണമാകുകയും ചെയ്ത കൊവിഡിന്റെ പുതിയ ഉപവകഭേദം ‘ജെഎൻ.1’ കേരളത്തിൽ സ്ഥിരീകരിച്ചതായി കേന്ദ്ര സർക്കാരാണ് വ്യക്തമാക്കിയത്. ഇതോടെയാണ് ‘ജെഎൻ.1 സ്ഥിരീകരിച്ച രാജ്യങ്ങളുടെ പട്ടികയിൽ ഇന്ത്യയുമെത്തിയത്.
79 വയസ്സുള്ള തിരുവനന്തപുരം സ്വദേശിക്കാണ് പുതിയ ഉപവകഭേദം സ്ഥിരീകരിച്ചത്. ഇതിന് പിന്നാലെ കേന്ദ്ര ആരോഗ്യ മന്ത്രാലയം ജാഗ്രതയും തയ്യാറെടുപ്പുകളും ശക്തമാക്കിയിരിക്കുകയാണ്. വിദേശത്ത് നിന്നും എത്തുന്നവർ കൂടുതലുള്ള കേരളത്തിൽ കൂടുതൽ ജാഗ്രത പുലർത്തണമെന്നാണ് കേന്ദ്ര സർക്കാർ നിർദേശം നൽകിയിരിക്കുന്നത്.
