കൊല്ലം : ഓയൂരിൽ നിന്നും തട്ടിക്കൊണ്ടു പോകപ്പെട്ട ആറു വയസ്സുകാരി പെൺകുട്ടിയെയും സഹോദരനെയും നവ കേരള സദസ്സിലേക്ക് ക്ഷണിച്ചുവരുത്തി മുഖ്യമന്ത്രി പിണറായി വിജയൻ. നവകേരള സദസിന്റെ കടക്കലിലെ വേദിയിലേക്ക് എത്തിയ ഇരുവരെയും ഹസ്തദാനം നൽകിയാണ് പിണറായി വിജയൻ സ്വീകരിച്ചത്. പ്രതികൂല സാഹചര്യത്തെ ധീരമായി നേരിട്ട കുട്ടികളെ പിണറായി വിജയൻ അനുമോദിക്കുകയും ചെയ്തു.
മുഖ്യമന്ത്രി പിണറായി വിജയൻ നേരിട്ട് ആവശ്യപ്പെട്ടത് പ്രകാരമാണ് കൊല്ലത്തെ നവ കേരള സദസ്സിലേക്ക് ആറ് വയസ്സുകാരി പെൺകുട്ടിയും കുടുംബവും എത്തിച്ചേർന്നത്. സദസ്സിനു മുൻപിൽ ഇരിക്കുകയായിരുന്ന ഇവരെ സുരക്ഷാ ഉദ്യോഗസ്ഥർ തന്നെയാണ് നേരിട്ട് മുഖ്യമന്ത്രിക്ക് അടുത്തേക്ക് ആനയിച്ചത്. വേദിയിലെത്തിയ പെൺകുട്ടിയെ നിറഞ്ഞ കൈയ്യടികളോടെയാണ് സദസ്സിൽ ഉണ്ടായിരുന്ന ആൾക്കൂട്ടം വരവേറ്റത്.
മുഖ്യമന്ത്രി പിണറായി വിജയൻ അഭിനന്ദനങ്ങൾ അറിയിച്ചതായി പെൺകുട്ടിയുടെ കുടുംബം പിന്നീട് വ്യക്തമാക്കി. ഹീറോ ആണെന്ന് മുഖ്യമന്ത്രി പറഞ്ഞതായി പെൺകുട്ടിയുടെ സഹോദരനും അറിയിച്ചു. കഴിഞ്ഞ നവംബർ 27 ന് ആയിരുന്നു ഓയൂരിൽ നിന്നും ആറ് വയസ്സുകാരിയായ പെൺകുട്ടിയെ തട്ടിക്കൊണ്ടുപോയത്. സംഭവം നടന്ന് 20 മണിക്കൂറുകൾക്ക് ശേഷം പ്രതികൾ കുട്ടിയെ കൊല്ലം ആശ്രാമം മൈതാനത്ത് ഉപേക്ഷിക്കുകയായിരുന്നു.
Discussion about this post