ആലപ്പുഴ : ചെങ്ങന്നൂരിൽ ഉത്സവ എഴുന്നള്ളിപ്പിന് എത്തിച്ച ആന കുഴഞ്ഞുവീണു. തിരുവിതാംകൂര് ദേവസ്വം ബോര്ഡിന്റെ ആനയായ വെട്ടിക്കാട് ചന്ദ്രശേഖരനാണ് എഴുന്നള്ളിപ്പിന് മുൻപായി കുഴഞ്ഞുവീണ് അവശനിലയിൽ ആയത്. ആനയ്ക്ക് ആവശ്യത്തിന് വിശ്രമം നൽകാതെ നിരന്തരമായി വിവിധ ചടങ്ങുകൾക്ക് കൊണ്ടുപോയതാണ് ആന കുഴഞ്ഞ് വീഴാൻ കാരണമെന്ന് ആരോപണമുയർന്നു.
നിലവിൽ എഴുന്നേൽക്കാൻ പോലും കഴിയാത്ത അത്ര അവശനിലയിലാണ് ആനയുള്ളത്. ആനയെ എഴുന്നേൽപ്പിക്കാൻ പാപ്പാന്മാർ ശ്രമിച്ചെങ്കിലും പരാജയപ്പെട്ടു. ചെങ്ങന്നൂർ മഹാദേവ ക്ഷേത്രത്തിലെ ഉത്സവത്തിനായാണ് ആനയെ എത്തിച്ചത്.
തിരുവിതാംകൂർ ദേവസ്വം ബോർഡിന്റെ ഉടമസ്ഥതയിലുള്ള ഈ ആനയ്ക്ക് നേരത്തെ തന്നെ ആരോഗ്യപ്രശ്നങ്ങൾ ഉണ്ടായിരുന്നതായും ആ അവസ്ഥ അവഗണിച്ചുകൊണ്ടും ആനയെ നിരന്തരമായി എഴുന്നള്ളിപ്പുകൾക്ക് കൊണ്ടുപോയിരുന്നതായും നാട്ടുകാർ ആരോപിച്ചു. എന്നാൽ
ആനയ്ക്ക് പ്രായാധിക്യം മൂലമുള്ള അവശതയാണെന്നാണ് ദേവസ്വം ബോര്ഡ് അധികൃതര് അഭിപ്രായപ്പെടുന്നത്.
Discussion about this post