കൊല്ലം: എൽ.പി സ്‌കൂൾ വിദ്യാർത്ഥികളെ അദ്ധ്യാപകൻ അശ്ലീല ദൃശ്യങ്ങൾ കാണിച്ച് ലൈംഗികാതിക്രമം നടത്തിയെന്ന് പരാതി. സംഭവത്തിൽ അദ്ധ്യാപകനെതിരെ പോലീസ് കേസെടുത്തു. കൊല്ലം കുളത്തൂപ്പുഴയിലാണ് സംഭവം. ട്രൈബൽ സ്‌കൂളിലെ അറബി അദ്ധ്യാപകനായ കാട്ടാക്കട പൂവച്ചൽ സ്വദേശി ബാത്തിഷാനെതിരെയാണ് കേസ്. പരാതി ഉയർന്നതിന് ശേഷം പ്രതി ഒളിവിൽ പോയി.
മൊബൈൽ ഫോണിൽ അശ്ലീല ദൃശ്യങ്ങൾ കാണിച്ച് കുട്ടികളുടെ ശരീരത്തിൽ സ്പർശിച്ചെന്നാണ് മാതാപിതാക്കളുടെ പരാതി. കുട്ടികൾ വീട്ടിലെത്തി രക്ഷിതാക്കളെ വിവരം അറിയിച്ചതിന് പിന്നാലെ രക്ഷിതാക്കൾ പരസ്പരം സംസാരിക്കുകയും മറ്റുകുട്ടികളോട് കൂടി വിവരം ചോദിക്കുകയും ചെയ്തിരുന്നു. ഇതോടെയാണ് സംഭവം പുറത്തറിയുന്നത്.
പോക്‌സോ, പട്ടികജാതി പീഡന നിരോധന നിയമം ഉൾപ്പടെ വകുപ്പുകൾ ചുമത്തിയാണ് കുളത്തൂപ്പുഴ പോലീസ് അദ്ധ്യാപകനെതിരെ കേസെടുത്തത്. മൂന്ന് മാസം മുൻപാണ് ബാത്തിഷാൻ സ്‌കൂളിൽ അദ്ധ്യാപകനായെത്തിയത്.
ലൈംഗികാതിക്രമം സ്‌കൂൾ അധികൃതർ മറച്ചുവച്ചെന്നും, പരാതി ഒതുക്കി തീർക്കാൻ ശ്രമിച്ചെന്നും ആരോപണമുണ്ട്. ഇക്കാര്യത്തിലും അന്വേഷണം നടത്തുമെന്ന് പോലീസ് അറിയിച്ചു.
Discussion about this post