എറണാകുളം: പി.വി അൻവർ എംഎൽഎയുടെ കക്കാടംപൊയിൽ പാർക്കിനെതിരായ ഹർജി ഹൈക്കോടതി ഇന്ന് പരിഗണിക്കും. പാർക്ക് തുറക്കാനുള്ള സർക്കാർ ഉത്തരവ് റദ്ദാക്കണമെന്ന് ആവശ്യപ്പെട്ടുള്ള ഹർജിയാണ് കോടതി ഇന്ന് പരിഗണിക്കുന്നത്. കേരള നദീസംരക്ഷണ സമിതി മുൻ ജനറൽ സെക്രട്ടറി ടി.വി രാജനാണ് ഹർജി നൽകിയത്.
2018 ൽ ഉരുൾപൊട്ടലിനെ തുടർന്നായിരുന്നു പിവീആർ നാച്വറോ പാർക്ക് അടച്ച് പൂട്ടിയത്. എന്നാൽ വർഷങ്ങൾക്കിപ്പുറം പാർക്ക് തുറക്കാൻ സർക്കാർ തീരുമാനിക്കുകയായിരുന്നു. പഠനം നടത്താതെയാണ് സർക്കാർ പാർക്ക് തുറക്കാൻ തീരുമാനിച്ചത്. ഇതോടെയാണ് രാജൻ ഹർജിയുമായി ഹൈക്കോടതിയെ സമീപിച്ചത്. സർക്കാർ ഉത്തരവ് റദ്ദാക്കണമെന്നും പാർക്കിലെ അനധികൃത നിർമ്മാണങ്ങൾ പൊളിച്ചുനീക്കണമെന്നും ചൂണ്ടിക്കാട്ടിയാണ് ഹർജി.
കക്കാടംപൊയിലിലെ പാർക്ക് പ്രവർത്തിക്കുന്നത് പഞ്ചായത്ത് ലൈസൻസില്ലാതെയെന്ന വിവരാവകാശ രേഖ ഹൈക്കോടതിയിൽ എത്തിയിരുന്നു. ഇതേ തുടർന്ന് ലൈസൻസോടെയാണോ പാർക്കിന്റെ പ്രവർത്തമെന്ന് മൂന്നു ദിവസത്തിനകം അറിയിക്കാൻ കൂടരഞ്ഞി പഞ്ചായത്തിന് ഹൈക്കോടതി നിർദ്ദേശം നൽകുകയും ചെയ്തിരുന്നു. ഇന്ന് ഇതുമായി ബന്ധപ്പെട്ട വിവരങ്ങൾ പഞ്ചായത്ത് ഹൈക്കോടതിയെ അറിയിക്കും. ജസ്റ്റിസ് വിജു എബ്രഹാമാണ് ഹർജി പരിഗണിക്കുന്നത്.
Discussion about this post