ചെന്നൈ; ലോക്സഭാ തിരഞ്ഞെടുപ്പിന് മുന്നോടിയായി രണ്ട് ദിവസത്തിനകം സഖ്യ പ്രഖ്യാപനം ഉണ്ടാകുമെന്ന് മക്കൾ നീതി മയ്യം അദ്ധ്യക്ഷനും നടനുമായ കമൽ ഹാസൻ പറഞ്ഞു. ഒരു ”നല്ല അവസരം” പ്രതീക്ഷിക്കുന്നു. തിരഞ്ഞെടുപ്പ് പ്രവർത്തനങ്ങൾ നന്നായി നടക്കുന്നുണ്ടെന്നും അദ്ദേഹം കൂട്ടിച്ചേർത്തു.
രണ്ട് ദിവസത്തിനുള്ളിൽ ഒരു സന്തോഷവാർത്തയുമായി ഞാൻ നിങ്ങളെ കാണും. പാർലമെന്റ് തെരഞ്ഞെടുപ്പിനുള്ള പ്രവർത്തനങ്ങൾ നന്നായി നടക്കുന്നു, നല്ല അവസരങ്ങൾ പ്രതീക്ഷിക്കുന്നു. സഖ്യം സംബന്ധിച്ച് രണ്ട് ദിവസത്തിനുള്ളിൽ തീരുമാനം പ്രഖ്യാപിക്കും,’ കമൽഹാസൻ പറഞ്ഞു.
അതേസമയം കമൽ ഹാസൻ ഡിഎംകെ സഖ്യത്തിനൊപ്പം അണിചേരുമെന്ന് റിപ്പോർട്ടുകൾ. തമിഴ്നാട്ടിൽ സീറ്റ് ചർച്ചകൾ പുരോഗമിക്കുന്ന വേളയിലാണ് ഇത് വീണ്ടും ചർച്ചയാവുന്നത്. സീറ്റ് വിഭജന ചർച്ചകൾ പൂർത്തിയാക്കുന്ന ഡിഎംകെ, കമൽ നേതൃത്വം നൽകുന്ന മക്കൾ നീതി മയ്യത്തെ (എംഎൻഎം) പുതിയ സഖ്യകക്ഷിയായി ഒപ്പം ചേർത്തേക്കും എന്നാണ് റിപ്പോർട്ടുകൾ .മക്കൾ നീതി മയ്യത്തിന് സീറ്റ് ലഭിച്ചില്ലെങ്കിൽ കോൺഗ്രസിന് ലഭിക്കുന്ന സീറ്റുകളിലൊന്നിൽ കൈപ്പത്തി ചിഹ്നത്തിൽ കമൽ മത്സരിക്കാൻ തയാറാകുമെന്ന തരത്തിൽ വാർത്തകളും പുറത്തുവരുന്നുണ്ട്. കഴിഞ്ഞ തവണ 10 സീറ്റുകളിൽ മത്സരിച്ച് 9 ഇടത്തും ജയിച്ച കോൺഗ്രസിന് ഇത്തവണ 9 സീറ്റ് ഡിഎംകെ അനുവദിക്കുമെന്നാണ് വിലയിരുത്തൽ. ഇതിൽ ഒരു സീറ്റ് കമലിന് നൽകുകയാവും ചെയ്യുക.
