പാലക്കാട് : ഉത്സവപ്പറമ്പിൽ നിന്നും മാരക രാസവസ്തു കലർന്ന ചോക്കുമിഠായികൾ പിടികൂടി. പാലക്കാട് മണപ്പുള്ളിക്കാവിൽ നടന്ന ഉത്സവ പരിപാടിക്ക് ഇടയിൽ നിന്നുമാണ് ജില്ലാ ഭക്ഷ്യസുരക്ഷാ വിഭാഗം ചോക്കുമിഠായികൾ പിടിച്ചെടുത്തത്. തുണികൾ ചായം മുക്കാനായി ഉപയോഗിക്കുന്ന മാരക രാസവസ്തുവായ റോഡമിൻ ബി ഉപയോഗിച്ചാണ് ചോക്കുമിഠായികൾക്ക് നിറം നൽകിയിരുന്നത്.
ഭക്ഷ്യസുരക്ഷാ അസിസ്റ്റന്റ് കമ്മീഷണർ വി ഷണ്മുഖന്റെ നേതൃത്വത്തിൽ നടത്തിയ പരിശോധനയിലാണ് വിഷ വസ്തു അടങ്ങിയ ചോക്കുമിഠായികൾ പിടികൂടിയത്. മാരക രാസവസ്തുവായ റോഡമിൻ ബി ശരീരത്തിൽ ചെല്ലുന്നത് ക്യാൻസറിനും കരൾ രോഗങ്ങൾക്കും ഇടയാക്കുന്നതാണെന്ന് നിരവധി പഠനങ്ങൾ തെളിയിച്ചിട്ടുണ്ട്.
റോഡമിൻ ബിയുടെ അധിക ഉപയോഗം ശരീരകോശങ്ങൾ നശിക്കാൻ കാരണമാകുന്നതാണ്. ശരീരത്തിൽ പ്രവേശിച്ചാൽ ഈ രാസവസ്തു കോശങ്ങളിൽ ഓക്സിഡേറ്റീവ് സ്ട്രസ് ഉണ്ടാക്കും. ഇതോടെ കരളിന്റെ പ്രവർത്തനം താളം തെറ്റുകയും ക്യാൻസറിനു വരെ കാരണമാവുകയും ചെയ്യുന്നതാണ്. ഈ മാരക രാസവസ്തുവിന്റെ സാന്നിധ്യം കണ്ടെത്തിയതിനെ തുടർന്ന് ഏതാനും ദിവസങ്ങൾക്കു മുൻപ് തമിഴ്നാട്ടിൽ പഞ്ഞി മിഠായി നിരോധിച്ചിരുന്നു.
Discussion about this post