മലയാളത്തിൽ വീണ്ടും സീരിസുമായി ഹോട്സ്റ്റാറെത്തുകയാണ്. ത്രില്ലർ സിനിമകളിലൂടെ ഇന്ത്യൻ സിനിമ പ്രേമികളുടെ പ്രിയങ്കരനായ ജീത്തു ജോസഫ് ഷോ റണ്ണറായി എത്തുന്ന ‘സീക്രട്ട് സ്റ്റോറീസ്: റോസ്ലിൻ’ എന്ന സീരിസ് ആണ് ഹോട്ട്സ്റ്റാർ പുതുതായി മലയാളത്തിൽ ഒരുക്കുന്നത്.
നടി മീനയാണ് സീക്രട്ട് സ്റ്റോറീസിൽ പ്രധാനപ്പെട്ട വേഷമിടുന്നത്. മൂത്തോൻ’ ഫെയിം സഞ്ജന ദിപു, ഹക്കിം ഷാ , വിനീത്, എന്നിവർ സീരിസിൽ പ്രധാനകഥാപാത്രങ്ങളായി എത്തുന്നുണ്ട്. മാർച്ച് 9 നായിരുന്നു സീരിസിന്റെ ചിത്രീകരണം ആരംഭിച്ചത്. മലയാളികളുടെ പ്രിയപ്പെട്ട പാട്ടെഴുത്തുകാരൻ വിനായക് ശശികുമാറാണ് സീരിസിന് കഥയും തിരക്കഥയും ഒരുക്കിയിരിക്കുന്നത്. ജിത്തു ജോസഫിന്റെയും അൻവർ റഷീദിന്റെയും അസോസിയേറ്റ് ആയിരുന്ന നവാഗതനായ സുമേഷ് നന്ദകുമാറാണ് സീരിസ് സംവിധാനം ചെയ്യുന്നത്.
മിഥുൻ മാനുവൽ തോമസ് സംവിധാനം ചെയ്യുന്ന അണലി എന്ന് പേരിട്ടിരിക്കുന്ന സീരിസും അണിയറയിൽ ഒരുങ്ങുന്നുണ്ട് . ലിയോണ ലിഷോയിയും നിഖില വിമലുമാണ് പ്രധാന കഥാപാത്രങ്ങളെ അവതരിപ്പിക്കുന്നത്. മിഥുനും ജനമൈത്രി എന്ന സിനിമയുടെ സംവിധായകൻ ജോൺ മന്ത്രിക്കലും ചേർന്നാണ് വെബ് സീരീസിന്റെ രചന. ഇവയ്ക്ക് പുറമെ നിതിൻ രഞ്ജി പണിക്കർ ഒരുക്കുന്ന മധുവിധു, നിവിൻ പോളി നായകനായി എത്തുന്ന ഫാർമ ,വിഷ്ണു ജി രാഘവ് ഒരുക്കുന്ന ലവ് അണ്ടർ കൺസ്ട്രക്ഷൻ തുടങ്ങിയവയും അണിയറയിൽ ഒരുങ്ങുന്ന ഹോട് സ്റ്റാർ വെബ് സീരിസുകളാണ്.
Discussion about this post