ബോളിവുഡ് താരം വിക്കി കൗശൽ അഭിനയിക്കുന്ന ഏറ്റവും പുതിയ ചിത്രമാണ് ഛാവ. നിർമ്മാതാക്കൾ വളരെ സർപ്രൈസ് ആയി സൂക്ഷിച്ചിരുന്ന ഈ ചിത്രത്തിന്റെ ചില ലൊക്കേഷൻ ചിത്രങ്ങൾ ചോർന്നതായാണ് ഇപ്പോൾ പരാതി ഉയർന്നിരിക്കുന്നത്. പുറത്തുവന്നിട്ടുള്ള ചിത്രങ്ങൾ നൽകുന്ന സൂചന അനുസരിച്ച് ഛാവയിൽ മറാത്ത ഭരണാധികാരി ഛത്രപതി സംഭാജി മഹാരാജിൻ്റെ വേഷത്തിലാണ് വിക്കി കൗശൽ എത്തുന്നത്.
സംഭാജി മഹാരാജായി വേഷപ്പകർച്ച നടത്തിയ വിക്കി കൗശലിന്റെ ചിത്രങ്ങൾ പുറത്തുവന്നതോടെ സമൂഹമാദ്ധ്യമങ്ങളിൽ ഇപ്പോൾ തന്നെ ഈ സിനിമ ചർച്ചാവിഷയം ആയിരിക്കുകയാണ്. ഛത്രപതി ശിവാജി മഹാരാജിന്റെ മകൻ സംഭാജി മഹാരാജിന്റെ ജീവിത കഥയാണ് ഛാവ എന്ന പുതിയ ചിത്രം പറയുന്നത്. മറാത്ത ചക്രവർത്തിയായ ശിവാജിയുടെയും ഭാര്യ സായിബായിയുടെയും മകനായി പുരന്ദർ കോട്ടയിൽ ജനിച്ച സംഭാജി മഹാരാജ് ശിവാജിക്ക് ശേഷം മറാത്ത സാമ്രാജ്യത്തിന്റെ അധികാരിയായിരുന്നു. 1689ൽ ഔറംഗസേബിന്റെ കൈകളാൽ കൊല്ലപ്പെടുന്നത് വരെ ചരിത്രപരമായ ഒരു ജീവിതമായിരുന്നു സംബാജി മഹാരാജ് നയിച്ചിരുന്നത്.
ഛത്രപതി സംഭാജി മഹാരാജായി വിക്കി കൗശൽ എത്തുന്ന ഛാവ ലക്ഷ്മൺ ഉടേക്കർ ആണ് സംവിധാനം ചെയ്യുന്നത്. രശ്മിക മന്ദാന ആണ് ചിത്രത്തിൽ നായികയായി അഭിനയിക്കുന്നത്. സംഭാജി മഹാരാജിന്റെ ഭാര്യ യേശുഭായി ഭോൻസാലെ എന്ന കഥാപാത്രത്തെയാണ് ചിത്രത്തിൽ രശ്മിക മന്ദാന അവതരിപ്പിക്കുന്നത്.
Discussion about this post