ലഖ്നൗ : അമേഠിയിൽ കോൺഗ്രസ് പ്രവർത്തകരുടെ പ്രതിഷേധം. മണ്ഡലത്തിൽ മത്സരിക്കാനായി രാഹുലോ പ്രിയങ്കയോ എത്തണമെന്ന് ആവശ്യപ്പെട്ടാണ് കോൺഗ്രസ് പ്രവർത്തകർ പ്രതിഷേധം നടത്തിയത്. അമേഠിയിലെ കോൺഗ്രസ് ഓഫീസിനു മുൻപിൽ കുത്തിയിരുന്നായിരുന്നു പ്രവർത്തകർ പ്രതിഷേധിച്ചത്.
ഒരുകാലത്ത് കോൺഗ്രസിന്റെയും നെഹ്റു കുടുംബത്തിന്റെയും കുത്തക മണ്ഡലങ്ങൾ ആയിരുന്ന അമേഠിയിലും റായ്ബറേലിയിലും ഇത്തവണ ആര് മത്സരിക്കും എന്ന കാര്യത്തിൽ ഇതുവരെ കോൺഗ്രസിൽ ധാരണയായിട്ടില്ല. അമേഠിയിൽ രാഹുൽ ഗാന്ധിയും റായ്ബറേലിയിൽ പ്രിയങ്കാ വദ്രയും മത്സരിക്കണമെന്നാണ് കോൺഗ്രസ് പ്രവർത്തകർ ആവശ്യപ്പെടുന്നത്. എന്നാൽ ഇരുവർക്കും ഈ മണ്ഡലങ്ങൾ ഏറ്റെടുക്കാൻ വലിയ താല്പര്യമില്ലെന്നാണ് സൂചന.
കഴിഞ്ഞ ലോക്സഭാ തിരഞ്ഞെടുപ്പിൽ ഉത്തർപ്രദേശിൽ കോൺഗ്രസ് ജയിച്ച ഒരേയൊരു മണ്ഡലം ആയിരുന്നു റായ്ബറേലി. സോണിയ ഗാന്ധി ആയിരുന്നു കഴിഞ്ഞ തിരഞ്ഞെടുപ്പിൽ റായ്ബറേലിയിൽ നിന്നും മത്സരിച്ചിരുന്നത്. എന്നാൽ ഇത്തവണ വിജയ സാധ്യതയിൽ പ്രതീക്ഷ ഇല്ലാത്തതിനാൽ സോണിയാഗാന്ധി രാജ്യസഭാ തിരഞ്ഞെടുപ്പിൽ മത്സരിച്ച് പാർലമെന്റിൽ എത്തുകയായിരുന്നു. അമേഠിയിൽ കഴിഞ്ഞതവണ രാഹുൽഗാന്ധിയെ പരാജയപ്പെടുത്തിയ സ്മൃതി ഇറാനി തന്നെയാണ് ഇത്തവണയും ബിജെപി സ്ഥാനാർത്ഥി എന്നതിനാൽ ഇവിടെ മത്സരിക്കാൻ രാഹുലിനും താല്പര്യമില്ല എന്നാണ് സൂചന.
Discussion about this post