ന്യൂഡൽഹി : എയർ ഇന്ത്യ വിമാനത്തിൽ യാത്രക്കാരന് നൽകിയ ഭക്ഷണത്തിൽ നിന്നും ബ്ലേഡ് ലഭിച്ചതായി പരാതി. പച്ചക്കറി മുറിക്കുന്ന യന്ത്രത്തിന്റെ ബ്ലേഡ് ആണ് ഭക്ഷണത്തിൽ നിന്നും യാത്രക്കാരന് ലഭിച്ചത്. മാദ്ധ്യമപ്രവർത്തകനായ മധുറെസ് പോളിനാണ് എയർ ഇന്ത്യ വിമാനയാത്രയിൽ ദുരനുഭവം ഉണ്ടായത്.
എയർ ഇന്ത്യ 175 വിമാനത്തിൽ ബംഗളൂരുവിൽ നിന്ന് സാൻഫ്രാൻസിസ്കോയിലേക്ക് നടത്തിയ യാത്രയ്ക്കിടയിൽ ആയിരുന്നു മധുറെസ് പോളിന് ഭക്ഷണത്തിൽ നിന്നും ബ്ലേഡ് ലഭിച്ചത്. യാത്രയ്ക്കിടെ മധുരക്കിഴങ്ങ് റോസ്റ്റും ഫിഗ് ചാട്ടുമായിരുന്നു ഇദ്ദേഹം ഓർഡർ ചെയ്തിരുന്നത്. ഈ ഭക്ഷണം കഴിക്കുന്നതിനിടയിലാണ് ബ്ലേഡ് ശ്രദ്ധയിൽപ്പെട്ടത്.
സംഭവത്തെക്കുറിച്ച് യാത്രക്കാരൻ സമൂഹമാദ്ധ്യമങ്ങളിൽ പോസ്റ്റ് ചെയ്തതോടെ എയർ ഇന്ത്യ ഖേദം പ്രകടിപ്പിച്ച് രംഗത്തെത്തി. സംഭവത്തെക്കുറിച്ച് വിശദമായ അന്വേഷണം നടത്തുമെന്നും എയർ ഇന്ത്യ അറിയിച്ചു. യാത്രക്കാരന് ഉണ്ടായ ദുരനുഭവത്തിന് പകരമായി അടുത്ത ഒരു വർഷത്തിനുള്ളിൽ ഉപയോഗിക്കാൻ കഴിയുന്ന രീതിയിലുള്ള സൗജന്യ വൺവേ ബിസിനസ് ക്ലാസ് ടിക്കറ്റ് കമ്പനി വാഗ്ദാനം ചെയ്തിട്ടുണ്ട്.
Discussion about this post