തിരുവനന്തപുരം: മുൻ വനിതാ നേതാവ് സിമി റോസ് ബെൽ ജോൺ പറഞ്ഞതുപോലെ കോൺഗ്രസ് പാർട്ടിയ്ക്കുള്ളിലും പവർഗ്രൂപ്പ് ഉണ്ടെന്ന് ബിജെപി വനിതാ നേതാവ് പത്മജ വേണുഗോപാൽ. ഇത് സിമിയുടെ മാത്രം അഭിപ്രായമല്ല. നല്ലൊരുവിഭാഗം വനിതാ പ്രവർത്തകരുടെയും അഭിപ്രായം ആണെന്നും പത്മജ പറഞ്ഞു. സിമിയെ കോൺഗ്രസിൽ നിന്നും പുറത്താക്കിയതിന് പിന്നാലെ ഫേസ്ബുക്കിലൂടെ ആയിരുന്നു പത്മജയുടെ പ്രതികരണം.
കോൺഗ്രസ് പാർട്ടിയിലെ പവർഗ്രൂപ്പിനെതിരെ ശക്തമായ പ്രതികരിച്ച സിമിയ്ക്ക് അഭിനന്ദനങ്ങൾ. പാർട്ടിയിൽ പവർഗ്രൂപ്പ് ഉണ്ട് എന്നത് നല്ലൊരു ശതമാനം വനിതാ നേതാക്കളും പറയുന്ന കാര്യമാണ്. വരും ദിവസങ്ങളിൽ എല്ലാവരും എല്ലാം തുറന്ന് പറയും. ഒരു സ്ത്രീയെ സംസ്കാര ശൂന്യമായി അധിക്ഷേപിച്ചാൽ അതിനെ നിയമപരമായി എങ്ങനെ നേരിടണം എന്ന് വ്യക്തമായി ബോധ്യമുള്ള ആളാണ് സിമിയെന്ന് ഓർത്താൽ നന്നുവെന്നും പത്മജ പറഞ്ഞു.
ഫേസ്ബുക്ക് കുറിപ്പിന്റെ പൂർണരൂപം
കോൺഗ്രസിലെ പവർ ഗ്രൂപ്പിലെ പ്രിയങ്കരികൾക്ക് മാത്രം സ്ഥാനങ്ങൾ പെട്ടെന്ന് പെട്ടെന്ന് ലഭിക്കുന്നതിനെതിരെ പ്രതികരിച്ച
സിമി റോസ്ബെൽ ജോണിന് അഭിനന്ദനങ്ങൾ..
കോൺഗ്രസ് സൈബർ അണികളുടെ തനിക്ക് നേരെയുള്ള തെറി വിളികൾക്കെതിരെ സിമി റോസ് ബെൽ ജോൺ DIG ക്ക് പരാതി നൽകി.. കോൺഗ്രസിൽ പവർ ഗ്രൂപ്പ് ഉണ്ട്, ആ പവർ ഗ്രൂപ്പിന് താല്പര്യമുള്ള അനർഹർ ആയ സ്ത്രീകൾക്ക് ഉന്നത സ്ഥാനങ്ങൾ പെട്ടെന്ന് ലഭിക്കുന്നു എന്ന പരാതിയാണ് സിമി ഉന്നയിച്ചത് … അർഹതയില്ലാത്ത യുവ വനിതയ്ക്ക് അപ്രതീക്ഷിതമായി രാജ്യസഭാ സീറ്റ് പെട്ടെന്ന് ലഭിച്ചതും, മറ്റൊരു വനിതയ്ക്ക് KPCC
ജനറൽ സെക്രട്ടറി പദം ലഭിച്ചതും പവർ ഗ്രൂപ്പിന്റെ താൽപര്യക്കാർ ആയതിനാലാണ് എന്ന ആരോപണമാണ് സിമി ഉന്നയിച്ചത്…
ഇത് സിമിയുടെ മാത്രം അഭിപ്രായമല്ല… കോൺഗ്രസിലെ നല്ലൊരു വിഭാഗം വനിതാ പ്രവർത്തകരുടെയും അഭിപ്രായമാണ്… സിമി അത് തുറന്നു പറയാൻ ആർജ്ജവം കാട്ടി എന്നു മാത്രം… കോൺഗ്രസിൽ ഇപ്പോൾ നടക്കുന്ന നെറികേടുകൾ ചൂണ്ടിക്കാട്ടി എന്നതിന്റെ പേരിൽ സിമിയെ സൈബർ അറ്റാക്ക് ചെയ്യാനും, വ്യക്തി ഹത്യ ചെയ്യാനും ഒക്കെ
കോൺഗ്രസ് അണികൾ നടത്തുന്ന നീക്കം തികച്ചും അപലനീയം- സിമി പറഞ്ഞ അഭിപ്രായത്തോട് യോജിപ്പുള്ള നിരവധി കോൺഗ്രസ് നേതാക്കളും ഉണ്ട്.. വരും ദിവസങ്ങളിൽ അവരും അതൊക്കെ തുറന്നു പറയുമെന്ന കാര്യത്തിൽ സംശയമില്ല..
ഒരു സ്ത്രീയെ സംസ്കാര ശൂന്യമായി അധിക്ഷേപിച്ചാൽ അതിനെ നിയമപരമായി എങ്ങനെ നേരിടണം എന്ന്
വ്യക്തമായി ബോധ്യമുള്ള ആളാണ് സിമി.. ഓർത്താൽ നന്ന്..
പത്മജ വേണുഗോപാൽ
Discussion about this post