ദോഹ: ഖത്തർ പൗരന്‍മാര്‍ക്ക് ഇനി അമേരിക്കയിലേക്ക് യാത്ര ചെയ്യാന്‍ വിസയുടെ ആവശ്യമില്ലെന്ന് വ്യക്തമാക്കി അമേരിക്കൻ ഹോംലാൻഡ് സെക്യൂരിറ്റി. ഇതോടു കൂടി യുഎസിന്‍റെ വിസ വെയ്‌വര്‍ പ്രോഗ്രാമില്‍ ഉള്‍പ്പെടുത്തി വിസരഹിത പ്രവേശം അനുവദിക്കപ്പെടുന്ന ആദ്യ ജിസിസി രാജ്യമായി ഖത്തര്‍ മാറി.
യുണൈറ്റഡ് സ്റ്റേറ്റ്‌സ് വിസ വെയ് വര്‍ പ്രോഗ്രാമില്‍ (വിഡബ്ല്യുപി) പ്രവേശിക്കുന്ന രണ്ടാമത്തെ മുസ്ലീം ഭൂരിപക്ഷ രാജ്യമാണ് ഖത്തർ . ബ്രൂണെയാണ് ഇതിനു മുമ്പ് ഈ പദ്ധതിയില്‍ ഉള്‍പ്പെട്ട മുസ്ലിം ഭൂരിപക്ഷ രാജ്യം. യുഎസ് ഡിപ്പാര്‍ട്ട്മെന്‍റ് ഓഫ് സ്റ്റേറ്റ്, ഹോംലാന്‍ഡ് സെക്യൂരിറ്റിയാണ് ഇതുമായി ബന്ധപ്പെട്ട പ്രഖ്യാപനം നടത്തിയത്. ഇതിന് ആവശ്യമായ കര്‍ശനമായ യോഗ്യതാ മാനദണ്ഡങ്ങളും സുരക്ഷാ ആവശ്യകതകളും പാലിച്ചതിന് ഖത്തറിനെ അമേരിക്ക അഭിനന്ദിച്ചു.
മേഖലയിലെ അമേരിക്കയുടെ തന്ത്രപരമായ പങ്കാളിയാണ് ഖത്തര്‍, കഴിഞ്ഞ കുറച്ച് വര്‍ഷങ്ങളായി ഞങ്ങളുടെ തന്ത്രപരമായ ബന്ധം കൂടുതല്‍ ശക്തമായി,’സ്റ്റേറ്റ്, ഹോംലാന്‍ഡ് സെക്യൂരിറ്റി വകുപ്പുകള്‍ സംയുക്ത പ്രസ്താവനയില്‍ അഭിപ്രായപ്പെട്ടു. ഖത്തറിന്‍റെ ശക്തമായ സുരക്ഷാ നടപടികളെയും മേഖലയിലെ സ്ഥിരതയ്ക്കുള്ള പ്രതിബദ്ധതയെയും അവര്‍ പ്രശംസിച്ചു.
