ദില്ലി: വായ്പകളില് അമിത പലിശ ഏര്പ്പെടുത്തുന്നതടക്കമുള്ള നിയമലംഘനങ്ങള്ക്ക് മൂലം നാല് ബാങ്കിങ് ഇതര ധനകാര്യ സ്ഥാപനങ്ങള്ക്ക് (എന്ബിഎഫ്സി) വിലക്കേര്പ്പെടുത്തി റിസര്വ് ബാങ്ക്. ആശീര്വാദ് മൈക്രോ ഫിനാന്സ് ലിമിറ്റഡ്, ആരോഹന് ഫിനാന്ഷ്യല് സര്വീസസ് ലിമിറ്റഡ്, ഡിഎംഐ ഫിനാന്സ്, നവി ഫിന്സെര്വ് എന്നീ സ്ഥാപനങ്ങളെയാണ് വായ്പ അനുവദിക്കുന്നതിനും വിതരണം ചെയ്യുന്നതിനും റിസര്വ് ബാങ്ക് ഓഫ് ഇന്ത്യ വിലക്കേര്പ്പെടുത്തിയത്. നിരോധനം ഒക്ടോബര് 21 മുതല് പ്രാബല്യത്തില് വരും.
സ്വര്ണ്ണ വായ്പ കമ്പനിയായ മണപ്പുറം ഫിനാന്സ് ആണ് ആശിര്വാദ് മൈക്രോ ഫിനാന്സ് പ്രമോട്ടുചെയ്യുന്നത്. നവി ഫിന്സെര്വ് മുന് ഫ്ലിപ്കാര്ട്ട് സഹസ്ഥാപകന് സച്ചിന് ബന്സാല് പ്രമോട്ടുചെയ്യുന്നു . ശിവാശിഷ് ചാറ്റര്ജിയും യുവരാജ സി സിംഗും ചേര്ന്ന് സ്ഥാപിച്ച ഡിഎംഐ ഫിനാന്സില് ജപ്പാനിലെ മിത്സുബിഷി അടുത്തിടെ 334 മില്യണ് ഡോളര് നിക്ഷേപിച്ചിരുന്നു.
ഈ കമ്പനികളുടെ വിലനിര്ണ്ണയ നയത്തില് അവരുടെ വെയ്റ്റഡ് ആവറേജ് ലെന്ഡിംഗ് റേറ്റ് നിരീക്ഷിച്ച മെറ്റീരിയല് സൂപ്പര്വൈസറിയുടെ ആശങ്കകളെ അടിസ്ഥാനമാക്കിയാണ് നടപടിയെടുത്തതെന്ന് ആര്ബിഐ പറഞ്ഞു. റിസര്വ് ബാങ്ക് പുറപ്പെടുവിച്ച ഫെയര് പ്രാക്ടീസ് കോഡിന് കീഴിലുള്ള വ്യവസ്ഥകളുമായി ഇത് പൊരുത്തപ്പെടുന്നില്ലെന്നും കണ്ടെത്തി.
ഗാര്ഹിക വരുമാനം വിലയിരുത്തുന്നതിനും മൈക്രോഫിനാന്സ് ലോണുകളുടെ കാര്യത്തില് നിലവിലുള്ള / പ്രതിമാസ തിരിച്ചടപിലവ് ബാധ്യതകള് പരിഗണിക്കുന്നതിനുമുള്ള റെഗുലേറ്ററി മാര്ഗ്ഗനിര്ദ്ദേശങ്ങള് പാലിക്കുന്നില്ലെന്നും ആര്ബിഐ കണ്ടെത്തി. ഉചിതമായ പരിഹാര നടപടികള് സ്വീകരിച്ചിട്ടുണ്ടെന്ന് കമ്പനികളില് നിന്ന് സ്ഥിരീകരണം ലഭിച്ചതിന് ശേഷം മാത്രം തീരുമാനം പുനഃപരിശോധിക്കുമെന്നും ആര്ബിഐ വ്യക്തമാക്കി.
Discussion about this post