പരസ്പരധാരണ പൂർത്തിയായി ; മിലിട്ടറി തിയേറ്റർ കമാൻഡ് സ്ഥാപിക്കാനൊരുങ്ങി ഭാരതം

ന്യൂഡെൽഹി:ലോക സൈനിക ശക്തികൾക്ക് സമാനമായി സേനയുടെ പ്രവർത്തനത്തിൽ തിയേറ്റർ കമാൻഡ് മാതൃക നടപ്പിലാക്കാനൊരുങ്ങി ഭാരതം. ഇതിനു വേണ്ടി കര, നാവിക, വായുസേന എന്നീ മൂന്ന് സർവീസുകളുടെയും തലവന്മാർ തമ്മിൽ പരസ്പര ധാരണ കൈവരിച്ചു കൊണ്ട് മിലിട്ടറി തിയേറ്റർ കമാൻഡുകളുടെ സൃഷ്ടിയിലേക്ക് കടക്കാനൊരുങ്ങുകയാണ് കേന്ദ്രം.

നിലവിൽ സൈനിക തിയേറ്റർ കമാന്റിനുള്ള പദ്ധതി തയ്യാറായിക്കഴിഞ്ഞു. എത്രയും പെട്ടെന്ന് തന്നെ അംഗീകാരത്തിനായി ഉന്നത രാഷ്ട്രീയ നേതൃത്വത്തിൻ്റെ മുമ്പാകെ ഉടൻ സമർപ്പിക്കും. മൂന്ന് സേവനങ്ങൾക്കിടയിൽ സമന്വയം കൈവരിക്കാൻ ലക്ഷ്യമിട്ടുള്ള ഇൻ്റർ-സർവീസസ് ഓർഗനൈസേഷൻസ് (കമാൻഡ്, കൺട്രോൾ, ഡിസിപ്ലിൻ) നിയമം സർക്കാർ വിജ്ഞാപനം ചെയ്തതോടെയാണ് തിയേറ്റർ കമാൻഡുകളിലേക്കുള്ള വഴി തുറന്നത്.

ഒരു പ്രത്യേക ഭൂമിശാസ്ത്രപരമായ പ്രദേശം സുരക്ഷിതമാക്കാൻ ഒരൊറ്റ കമാൻഡറുടെ കീഴിൽ മൂന്ന് സേവനങ്ങളുടെയും (ആർമി, നേവി, എയർഫോഴ്സ്) വിഭവങ്ങൾ സംയോജിപ്പിക്കുന്നതിനെയാണ് സംയോജിത തിയേറ്റർ കമാൻഡുകൾ എന്ന് വിളിക്കുന്നത്.

ചീഫ് ഓഫ് ഡിഫെൻസ് സ്റ്റാഫിന്റെ നിയമനവും ഡിപ്പാർട്ട്‌മെൻ്റ് ഓഫ് മിലിട്ടറി അഫയേഴ്‌സ് (ഡിഎംഎ) രൂപീകരണവും പ്രതിരോധ സേനകളുടെ സംയോജനത്തിനും മുന്നേറ്റത്തിനുമുള്ള സുപ്രധാന ചുവടുവയ്പുകൾ ആയിരിന്നു.

ഇന്ത്യൻ കരസേനയ്ക്കും നാവികസേനയ്ക്കും വ്യോമസേനയ്ക്കും ഇന്ത്യയിലുടനീളം അവരുടേതായ കമാൻഡുകളുണ്ട് . എന്നാൽ സംയോജിത ആസൂത്രണത്തിനും ഏകോപിത ആപ്ലിക്കേഷൻ്റെയും ഉത്തരവാദിത്തം ഈ തിയേറ്റർ കമാൻഡിന് മാത്രമായിരിക്കും.

ചൈനയും അമേരിക്കയും ഉൾപ്പെടെ നിരവധി രാജ്യങ്ങളിൽ തിയേറ്റർ കമാൻഡുകളുണ്ട്. ലഫ്റ്റനൻ്റ് ജനറൽ (റിട്ട.) ഡി.ബി.ഷേകാട്ട്കറുടെ നേതൃത്വത്തിലുള്ള സൈനിക പരിഷ്കരണ കമ്മീഷൻ റിപ്പോർട്ടുകളാണ് തിയേറ്റർ കമാൻഡ് എന്ന ആശയത്തെ ഒരു യാഥാർഥ്യമാക്കി മാറ്റുന്നതിലേക്ക് നയിച്ചത്.

മൂന്ന് സേവനങ്ങളും നിലവിൽ വെവ്വേറെ ആശയവിനിമയ ശൃംഖലകളിലാണ് പ്രവർത്തിക്കുന്നത്. ഡൽഹിയിലെ ബന്ധപ്പെട്ട സർവീസിൻ്റെ ആസ്ഥാനം വഴി എല്ലാം കടന്നു പോകേണ്ടതിനാൽ നിലവിൽ വിവരങ്ങൾ കൈമാറാൻ കൂടുതൽ സമയമെടുക്കുന്നുണ്ട്. മാത്രമല്ല സൈന്യം, നാവികസേന, വ്യോമസേന എന്നിവയുമായുള്ള സേവനങ്ങൾക്കിടയിൽ രഹസ്യവിവരങ്ങൾ തടസ്സങ്ങളില്ലാതെ പങ്കിടാനും നിലവിൽ കഴിയില്ല.

തിയേറ്റർ കമാൻഡുകൾ ഭാവിയാണെന്ന് വിദഗ്ധർക്ക് പണ്ടേ അറിയാമായിരുന്നു . P-5 രാജ്യങ്ങൾക്കെല്ലാം തിയേറ്റർ കമാൻഡ് ഘടനകളുണ്ട്, കൂടാതെ ഭൂതകാലത്തെ അടിസ്ഥാനമാക്കിയുള്ള ചിട്ടവട്ടങ്ങളിലും സുരക്ഷാ സംവിധാനത്തിലും സായുധ സേന പ്രവർത്തിക്കുന്നത് ഇന്ത്യക്ക് താങ്ങാനാവില്ലെന്നും ഒരു വസ്തുതയായിരിന്നു.

തിയേറ്റർ കമാൻഡുകളുടെ ഏറ്റവും പ്രധാനപ്പെട്ട ഫലം ചെലവേറിയ സൈനിക വിഭവങ്ങളുടെ യുക്തിസഹമായ ഉപയോഗവും, പ്ലാറ്റ്ഫോമുകളുടെ സംയോജനവുമാണ്. ആചാരപരമായ പരിപാടികൾ വെട്ടിക്കുറയ്ക്കാനും പാശ്ചാത്യ തന്ത്രങ്ങളെ അന്ധമായി പിന്തുടരുന്നതിനു പകരം പ്രാദേശിക സന്ദർഭത്തിന് അനുയോജ്യമായ യുദ്ധതന്ത്രങ്ങൾ മെനയാനുമാണ് നിലവിൽ ആലോചിക്കുന്നത്.