അഖില ഭാരതീയ വിദ്യാർത്ഥി പരിഷത്തിൻ്റെയും വിദ്യാർത്ഥി നിധി ട്രസ്റ്റിന്റെയും ആഭിമുഖ്യത്തിൽ നൽകിവരുന്ന പ്രൊഫ യശ്വന്ത് റാവു ഖേൽക്കർ യുവ പുരസ്കാരത്തിൻ്റെ വിജയിയായി താനെ സ്വദേശിയും ട്രെയിനിംഗ് ആൻഡ് എഡ്യൂക്കേഷണൽ സെന്റർ ഫോർ ഹിയറിംഗ് എംപയേർഡ് സഹസ്ഥാപകനുമായ ദീപേഷ് നായരെ തെരഞ്ഞെടുത്തു.
ഉത്തർപ്രദേശിലെ ഗോരഖ്പൂരിൽ നവംബർ 22 23 24 തീയതികളിൽ നടക്കുന്ന 70-ാം എബിവിപി ദേശീയ സമ്മേളനത്തിൽ ശ്രീ ദീപേഷ് നായർക്ക് ഒരു ലക്ഷം രൂപയും പ്രശസ്തിപത്രവും ഫലകവും അടങ്ങുന്ന പുരസ്കാരം സമ്മാനിക്കും.
ആധുനിക എബിവിപിയുടെ ശിൽപ്പിയും മുൻ ദേശീയ അധ്യക്ഷനുമായ പ്രൊഫസർ യശ്വന്ത് റാവു കേൽക്കറുടെ സ്മരണാർഥം 1991 മുതലാണ് പുരസ്കാരദാനം ആരംഭിച്ചത്. വിദ്യാഭ്യാസ മേഖലയുടെ ഉന്നമനത്തിനും , പരിസ്ഥിതി സംരക്ഷണത്തിനും അതേപോലെ സാമൂഹിക സേവന രംഗത്തും സ്തുത്യർഹമായ സംഭാവനകൾ നൽകിവരുന്ന ഭാരതത്തിലെ യുവ സംരംഭകർക്ക് പുരസ്കാരം സമ്മാനിച്ച് അവരെ അനുമോദിക്കുവാനും അതുവഴി അവരുടെ പ്രവർത്തനങ്ങൾക്ക് നവ ഊർജ്ജം പകരുവാനുമാണ് പുരസ്കാര സമർപ്പണത്തിലൂടെ എബിവിപി ലക്ഷ്യമിടുന്നത്.
പുരസ്കാര വിജയിയായി തെരഞ്ഞെടുക്കപ്പെട്ട ശ്രീ ദീപേഷ് നായർ ട്രെയിനിംഗ് ആൻഡ് എഡ്യൂക്കേഷണൽ സെന്റർ ഫോർ ഹിയറിംഗ് എംപയേർഡ് (TEACH) എന്ന പേരിൽ ബധിര വിദ്യാർത്ഥികളുടെ ഉന്നത വിദ്യാഭ്യാസത്തിനും ക്ഷേമത്തിനും വേണ്ടി പ്രവർത്തിക്കുന്ന സംഘടനയുടെ സഹസ്ഥാപകനും ചീഫ് ഓപ്പറേറ്റിങ് ഓഫീസറുമാണ്.കെ.ജി സോമയ്യ ഇൻസ്റ്റിറ്റ്യൂട്ടിൽ നിന്നും എംബിഎ പൂർത്തിയാക്കിയ അദ്ദേഹത്തിന് കോർപ്പറേറ്റ് മേഖലയിൽ 12 വർഷത്തെ പ്രവർത്തന പരിചയമുണ്ട് .ജെ .പി മോർഗൻ ബാംഗിങ് സൊല്യൂഷൻസ്, സിറ്റി ബാങ്ക് മുതലായ പ്രമുഖ സ്ഥാപനളിൽ അദ്ദേഹം സേവനമനുഷ്ഠിച്ചിട്ടുണ്ട്.ബധിര വിദ്യാർത്ഥികളുടെ വിദ്യാഭ്യാസത്തിനും സമഗ്ര വികാസത്തിനും അനുയോജ്യമായ ഒരു പഠനാന്തരീക്ഷം കെട്ടിപ്പടുക്കുന്നതിനായി 2016 ൽ ആണ് ദീപേഷ് നായർ സുഹൃത്തായ അമൻ ശർമ്മയോടൊപ്പം ചേർന്ന TEACH എന്ന സംഘടന ആരംഭിക്കുന്നത്. മഹാരാഷ്ട്രയിലെ താനെ,പൂണെ, ദില്ലി എന്നീ പ്രധാന നഗരങ്ങൾ കേന്ദ്രീകരിച്ചാണ് നിലവിൽ TEACH ൻ്റെ പ്രവർത്തനങ്ങൾ നടക്കുന്നത്.
എബിവിപി ദേശീയ പ്രസിഡന്റ് പ്രൊഫ രാജ് ശരൺ ഷാഹി, ദേശീയ ജനറൽ സെക്രട്ടറി ഡോ വീരേന്ദ്ര സിംഗ് സോളങ്കി, ദേശീയ സംഘടന സെക്രട്ടറി ശ്രീ ആശിഷ് ചൗഹാൻ പുരസ്കാര നിർണയ സമിതി കൺവീനറും മുൻ എബിവിപി ദേശീയ അധ്യക്ഷനുമായ പ്രൊഫ മിലിന്ദ് മറാഠെ എന്നിവർ യശ്വന്ത് റാവു ഖേൽക്കർ പുരസ്കാര വിജയിയായി തെരഞ്ഞെടുക്കപ്പെട്ട ശ്രീ ദീപേഷ് നായർക്ക് ആശംസകൾ നേർന്നു.
Discussion about this post